Siz, aziz muxlislar, tinglangiz so‘zim,

Chehrangiz ko‘rganda, nur sochar ko‘zim.

Stadion bag‘rida o‘tgan on-kezim,

Men, axir futbolning dog‘iman, dog‘i.

             Kelsangiz, hamisha joy bor yonimda,

             Gol zavqi jo‘sh urar qaynoq qonimda.

             Lazzat yuz ochadur  oshu nonimda,

             Men, axir futbolning dog‘iman, dog‘i.

Ishoning, bu kunlar o‘tar-da ketar,

«Bo‘rilar» hamlasi dilni shod etar.

«Sherlar»ning na’rasi falakka yetar,

Men, axir futbolning dog‘iman, dog‘i.

             «Qaldirg‘och», «burgutlar» ko‘rsatib o‘yin,

             Chalishar, albatta, zafarlar kuyin.

             Raqiblar noiloj egishar bo‘yin,

             Men, axir futbolning dog‘iman, dog‘i.

Bir boqing, Murodjon, Rayim, Ergashvoy,

Yam-yashil maydonda o‘zgacha chiroy.

Shaydosi bo‘lasiz siz ham hoynahoy,

Men, axir futbolning dog‘iman, dog‘i.

             Cho‘ntakka zo‘r kelib chipta bahosi,

             O‘rlasa samoga ko‘ngil sadosi.

             Yo‘l ochar sizlarga chollar asosi,

             Men, axir futbolning dog‘iman, dog‘i.

Ko‘plashib kelinglar, to‘lsin o‘yingoh,

Odam-la fayzlidir har qanday dargoh.

Shunda-chi, Bahromni qiynamas oh-voh,

Men, axir futbolning dog‘iman, dog‘i.

Bahrom SIDDIQOV, Jizzax shahri.