Yoshlar (U19) o‘rtasidagi Osiyo chempionati saralash bosqichi doirasida "V" guruhi o‘yinlari Dushanbeda start oldi. O‘zbekiston terma jamoasi ham mazkur saralash bosqichida ishtirok etish uchun Tojikistonga yo‘l olganidan xabaringiz bor.

Kecha guruhning dastlabki o‘yinlari bo‘lib o‘tdi. E’tiborli tomoni, har ikkala bahsda durang natija qayd etildi. Maldiv orollari va Shri Lanka terma jamoalari o‘rtasidagi o‘yin 2:2 hisobi bilan yakunlandi. Uchrashuvga qo‘shib berilgan daqiqalarda shri-lankaliklar hisobni tenglashtirishga muvaffaq bo‘ldi.

Mezbon — Tojikiston yoshlar terma jamoasi esa, kutilmaganda, Bangladesh darvozasiga yo‘l topa olmadi — 0:0.

Aleksandr Mochinov boshchiligidagi O‘zbekiston yoshlar terma jamoasi dastlabki o‘yinni ertaga, 2 noyabr kuni Shri-Lankaga qarshi o‘tkazadi.

2 noyabr, payshanba
12:00  Shri-Lanka – O‘zbekiston
15:00  Maldiv orollari – Bangladesh

4 noyabr, shanba
12:00  O‘zbekiston – Maldiv orollari
15:00  Tojikiston – Shri-Lanka

6 noyabr, dushanba
14:00  Bangladesh – O‘zbekiston
17:00  Tojikiston – Maldiv orollari

8 noyabr, chorshanba
14:00  Shri-Lanka – Bangladesh
17:00  O‘zbekiston – Tojikiston

Izoh: Uchrashuv soatlari Toshkent vaqti bilan ko‘rsatilgan.

Ma’lumot uchun, U-19 Osiyo chempionatiga mezbon Indoneziyadan tashqari saralashning guruh bosqichida birinchi o‘rinni egallagan 10 jamoa hamda ikkinchi o‘rinni egallagan eng yaxshi 5 jamoa yo‘l oladi. U-19 OCH final bosqichi 2018 yilning 18 oktyabr – 4 noyabr kunlari bo‘lib o‘tadi.