2017 yilning o‘tgan 10 oyi davomida O‘zbekiston sportchilari mahalliy va xalqaro sport musobaqalarda 483 ta oltin, 394 ta kumush, 536 ta bronza, jami 1 ming 413 ta medal qo‘lga kiritdi. Bu haqda 31 oktyabr kuni O‘zbekiston Respublikasi Prezidenti Shavkat Mirziyoyev raisligida o‘tkazilgan yig‘ilish vaqtida ma’lum qilindi.

Jismoniy tarbiya va sport sohasida boshqarish tizimini takomillashtirish, ommaviy sportni rivojlantirish, iqtidorli sportchilarni tanlash va tarbiyalash, sohani malakali kadrlar bilan mustahkamlash hamda zamonaviy sport inshootlarini barpo etish masalalariga bag‘ishlangan yig‘ilish davomida bu sohada amalga oshirilgan ishlar sarhisob qilindi. 

2017 yilning o‘zida mazkur sohaga oid 20 dan ortiq hujjat — Prezident farmoyish va qarorlari, Vazirlar Mahkamasining qarorlari e’lon qilindi.

O‘zbekiston Respublikasi Xalq ta’limi vazirligi tuzilmasidagi O‘zbekiston Bolalar sportini rivojlantirish jamg‘armasi ijro apparati, 300 ga yaqin sport ta’lim muassasasi Davlat qo‘mitasi tasarrufiga o‘tkazildi.

Jismoniy tarbiya va ommaviy sportni rivojlantirish kengashi tashkil etildi.

Hududiy boshqaruv organlari tarkibida 201 ta tuman (shahar)da jismoniy tarbiya va sport bo‘yicha vakillar faoliyati yo‘lga qo‘yildi.

Yig‘ilishda yutuqlar bilan birga tanqidiy xulosalar ham bildirildi. Xususan, sportchilarning xalqaro musobaqalarda qo‘lga kiritilayotgan medallari faqat boks, dzyudo, og‘ir atletika va sport kurashlari bilan chegaralanib qolayotgani tanqid ostiga olindi.

Gimnastika, trampolin, yengil atletika, taekvondo, baydarka va kanoeda eshkak eshish, velosport kabi boshqa salohiyatli sport turlari bo‘yicha ham ko‘proq yutuqlarga erishish yuzasidan aniq choralar belgilab berildi.

O‘zbekiston Respublikasi Prezidenti tegishli qo‘mita va mutasaddilar oldiga aniq vazifalar belgilab berdi.