“Nasaf” – “Metallurg” (2:0) uchrashuvi nihoyasiga yetgach, uchrashuv yakunlariga bag‘ishlangan matbuot anjumani bo‘lib o‘tdi. Matbuot anjumanining dastlabki qismida “Metallurg” jamoasi ustozi Rustam Mirsodiqov ishtirok etdi va quyidagi fikrlarni bildirdi.

"Nima ham derdim, o‘yinni o‘zlaringiz ko‘rdilaringiz. “Nasaf”ga g‘alaba juda zarur edi. Bunga haqli erishdi. Albatta bunday jamoaning o‘z maydonida, shunday muxlislari ko‘z o‘ngida o‘ynashi ularga katta ustunlik beradi. Biz ham harakat qildik, ammo omad kelmagandan keyin maqsadga erishish qiyin. Balki birinchi bo‘limda Zohid Abdullayev gol urganida, o‘yin boshqacharoq bo‘lishi ham mumkin edi. Futbol shunisi bilan qiziq, kimdir gol urib yutadi, kimgadir gol urishda omad yetishmaydi.

Ro‘ziqul Berdiyevni xuddi ukamdek ko‘raman. U yosh futbolchilarga ishonch bildirib, ularni tarbiyalab, tezkor va zamonaviy futbol o‘ynashga o‘rgatgan. Bugungi futbol shuni talab qiladi. Uning bu harakatlarini e’tirof etish kerak. Bugungi uchrashuvda ham uning ko‘plab yosh shogirdlari maydonda ajoyib harakat qilishdi", — dedi Mirsodiqov.