“Bavariya” nafaqat Germaniya va Yevropa, balki butun dunyoda ham barqaror, kuchli va boy klublardan biri hisoblanadi. Bu darajaga erishishda, albatta, klub marketing bo‘limining xizmati katta. Quyida “Bavariya” va uning uy stadioni bo‘lmish “Alyans-Arena” haqida qiziqarli ma’lumotlar bilan tanishishingiz mumkin.
Bundesligada stadionlarga o‘rtacha 42 mingga yaqin tomoshabin kirsa, “Alyans-Arena” doim to‘la bo‘ladi – 71000 tomoshabin.
Ichki chempionat o‘yinlari uchun chiptalar narxi raqibning mavqei va o‘yinchilarning qiziqishidan kelib chiqqan holda ikki toifaga bo‘linadi. “A” toifadagi chiptalar 30-70 yevro, “B” toifadagi chiptalar 20-60 yevrodan sotiladi.
Chiptalar qimmatligi borasida “Bavariya” o‘rta o‘rinlardan birini egallaydi. Oddiygina “Gamburg”ning uy stadioniga chipta narxi “Bavariya”nikiga nisbatan qimmatroq.
Bunga sabab esa quyidagicha: 35 mingta chipta mavsumiy abonement sifatida mavsum boshidayoq sotib bo‘linadi. Har bir uchrashuvda stadiondagi o‘rinlarning 10 foizi mehmon jamoa ishqibozlari uchun ajratiladi. Bundan tashqari, homiy tashkilotlar uchun ham har bir o‘yin uchun chiptalar ajratiladi. Oqibatda sotuvga oz miqdorda chipta qoladi. O‘rtahol aholi ham futbol ko‘rishdan bebahra qolmasligi uchun chiptalar arzon narxda sotuvga chiqariladi.
Lekin vip-hududlar chiptalari narxi o‘ta qimmat bo‘lib, bu borada “Bavariya” Bundesligada birinchi o‘rinda turadi.
Stadionda 106ta korporativ loja bo‘lib, ularning eng qimmati bir mavsum uchun 450 ming, eng arzoni 250 ming yevro turadi. Lojalarni ijaraga olish bo‘yicha shartnoma kamida besh yilga tuziladi.
Shuningdek, stadionda 5000ga yaqin vip-o‘rindiqlar ham bo‘lib, ularning bir martalik narxi 400 yevrodan boshlanadi. Loja va vip-o‘rindiqlardagi tomoshabinlar uchun bepul taom va ichimliklar, klub do‘konida chegirmalar, avtomobil turargohidan avtomobil uchun joy beriladi.
Stadion oldidagi avtoturargohga 15 mingta mashina sig‘ishi mumkin. Turargohdagi har bir avtomobil uchun 10 yevrodan haq olinadi.
“Alyans-Arena”dagi “Bavariya” do‘koni o‘yin o‘tkaziladigan kunlari yarim million yevrogacha daromad keltirishi mumkin. Myunxenda klubning to‘qqizta do‘koni faoliyat ko‘rsatadi.
Klub o‘tgan mavsumda 16,5 million yevro sof daromad ko‘rgan. “Bavariya” 22 yildan buyon faqat daromad topayotgan dunyodagi yagona klubdir.
