«MYU» tarixida yorqin iz qoldirgan afsonaviy darvozabon Edvin van der Sar 47 yoshga to‘ldi.

FourFourTwo shu bahona ikki mamlakat birinchiligida 8 marta oltin medal yutgan, shuningdek, CHLda 2 bora g‘olib chiqqan Gollandiya futboli faxrlaridan birini suhbatga chorlab, unga o‘z o‘quvchilaridan tushgan savollar bilan murojaat qildi.

«Qo‘l ostimdagi klubning sovrinlarni qo‘lga kiritish barobarida moliyaviy jihatdan baquvvat bo‘lishiga urinishim vaqtida jamoamni sardor sifatida olg‘a boshlaganimga o‘xshaydi», - deya so‘z boshladi «Ayaks»ning amaldagi bosh direktori Edvin van der Sar.

Gollandiyalikning aytishicha, biznes sohasida yetarli malakaga ega bo‘lmasada, futbolda 20 yil davomida to‘plagan tajribasi klubni muvaffaqiyatli boshqarishida juda asqotmoqda.

Ahamiyatli tomoni, u 1990-1999 yillar oralig‘ida aynan «Ayaks»da a’lo darajada o‘ynab, klubning Gollandiyada 4 marta chempionlikka erishishi, mamlakat kubogini 3 bora yutishi, shuningdek, UYEFA kubogida g‘olib chiqishiyu, CHL-95da «Milan»dan ustun kelib, bosh sovrinni qo‘lga kiritishiga mislsiz hissa qo‘shgandi.

Bunday muvaffaqiyatlar Edvinga hozirgi ishida ham alohida ishonch va kuch bag‘ishlashi tayin.

- Aytingchi, boshidan darvozabon bo‘lishni xohlaganmisiz? Ilk bor darvoza chizig‘iga turgan kuningiz yodingizdami?

- Aslida dastlabki 2 yil davomida maydon o‘yinchisi sifatida shug‘ullanganman. Biroq bir kuni darvozabonimiz navbatdagi uchrashuvga kelmadi va murabbiy buyurdi:

«Edvin, bolalar orasida eng bo‘ydorisan, shuning uchun bugun darvozani qo‘riqlaysan». O‘sha o‘yinda harakatlarim shu darajada omadli chiqdiki, natijada darvozabonlik qo‘lqopi doimiy hamrohimga aylandi.

Ancha vaqt oddiy havaskorlar jamoasi - «Nordveyk»da o‘ynadim va hattoki, professional futbolchi sifatida tanilish orzum qachondir ro‘yobga chiqishi haqida o‘ylamagandim ham.

Faqat 19 yoshga to‘lganimda, «Sparta» (Rotterdam) vakillari uchinchi darvozabon roliga taklif etishdi. Ammo klub ko‘chib o‘tishim uchungina pul to‘lashini ma’lum qilgach, «Nordveyk»da qolishni ma’qul ko‘rdim.

Oradan yana bir necha kun o‘tib, «Ayaks»dan qo‘ng‘iroq bo‘ldi va darhol shartnoma tuzishga ko‘ndim.

- Keyingi vaqtlarda «darvozabon - so‘nggi himoyachi» uslubi ommalashayotganiga qanday qaraysiz? Zero, vaqtida oyoqlar bilan juda yaxshi o‘ynagansiz va aytish mumkinki, bu uslubning keng yoyilishida hissangiz katta.

- 90-yillardayoq «Ayaks»da maxsus tizim ishlab chiqqandik va unga asosan pozision hujumni tashkillashda ishtirok etardim. Agar bu uslubga amal qilishda me’yordan chiqib ketmasangiz, katta naf keltirishi, shubhasiz.

Ammo menimcha, hozir ko‘pchilik chegaradan o‘tib ketyapti. Unutmaslik kerak, golkiperning asosiy vazifasi - to‘p o‘tkazib yubormaslik.

- Nima deb o‘ylaysiz, Gollandiyaning yana biror jamoasi qachondir CHL kubogini boshi uzra baland ko‘tara olarmikan?

- Afsuski, hozirgi holatda bu juda-juda qiyin ish. Hattoki, mening davrimda, ya’ni bundan 20 yil oldin ham CHLda g‘olib chiqish katta jasorat hisoblanardi.

Vaholanki, o‘sha vaqt turnirda bitta mamlakatdan 1ta jamoa qatnashardi, qolaversa, asosiy bos-qichda bor-yo‘g‘i 16ta ishtirokchi bo‘lardi. Yangi format qabul qilingach, aytish mumkinki, romantik davr ortda qoldi.

Ayni payt yangi-yangi qoidalar amalga tatbiq etilmoqda, ammo umumiy holat o‘zgarmaydi, baribir - katta byudjetga ega jamoalar musobaqa favoritlari bo‘lib qolaveradilar.

- «Ayaks»ning o‘sha tarkibi Yevropa grandlari oromini o‘g‘irlagan futbolchilarga to‘la edi. Qiziq, «Yuventus» sizni qo‘lga kiritish yo‘lida qaysi klublar bilan raqobatlashgandi?

- 1999 yili «Ayaks» bilan xayrlashgach, Liverpulga borib, «Enfild» bo‘ylab sayr qildim, Jerar UlYE, klub raisi va bir qator futbolchilar bilan uchrashdim.

Xullas, bu masalada uzoq o‘yladim, ammo «Yuventus» vakillari aloqaga chiqishgach, Italiyada o‘ynash katta chorlov ekanligini angladim. Shu orada «MYU»dan ham taklif tushdi.

«Yuve» bilan shartnoma tuzishga yaqin kelganimga qaramay, Aleks Fergyusonning akasi bilan gaplashdim. Chunonchi, menda butunlay bosh-qa madaniyat va o‘yin uslubiga ega mamlakatda o‘ynash xohishi yuqori edi.

Keyinroq bildimki, Fergyuson darhaqiqat, meni o‘z jamoasida ko‘rishni xohlagan, ammo boshqaruv raisi erkin agent maqomidagi Mark Bosnich nomzodini ma’qullagan.

Xullas, Peter Shmeyxel izdoshi o‘rnida faqat meni ko‘rishgan, ammo keyinchalik nomzodlar soni ko‘payib ketdi. «Fulxem»da o‘ynaganimda esa, «Arsenal» qiziqishi haqida eshitdim, ammo hammasi gap-so‘zligicha qolib ketdi.

- «Yuventus»da Zayniddin Zidan bilan birga o‘ynagansiz, uning qaysi fazilatlaridan alohida lol qolgansiz? Fransuz inson sifatida qanday edi? DAVOMI