Avval xabar berganimizdek,bugun 17 noyabr kuni O‘zbekiston Futbol Federasiyasi Prezidenti Umid Ahmadjonov Tokio shahrida Yaponiya Futbol Assosiasiyasi Prezidenti Tashima Kodzo bilan rasmiy uchrashuv o‘tkazdi.
Uchrashuv davomida O‘zbekiston Futbol Federasiyasi va Yaponiya Futbol Assosiyasiyasi o‘rtasidagi hamkorlik va aloqalarni mustahkamlash bo‘yicha kelishuvga erishildi.
Ushbu kelishuvasosida har ikki mamlakatning turli yoshdagi terma jamoalari o‘rtasida o‘rtoqlik o‘yinlarini o‘tkazish, turli musobaqalar va mavsumiy yig‘inlarni tashkil etish, O‘FF va YAFA terma jamoalari murabbiylari o‘rtasida tajriba almashishni yo‘lga qo‘yish ko‘zda tutilgan.
Shuningdek, O‘zbekiston Futbol Federasiyasi va Yaponiya Futbol Assosiasiyasi murabbiylari va tibbiyot xodimlari uchun o‘quv seminarlari tashkil etish, futbol akademiyasi murabbiylari va boshqaruv xodimlari o‘rtasida bilim va tajribalarni almashish, bolalar futboli bo‘yicha murabbiylik kurslarini tashkil etish borasida ham kelishuvga erishildi.
Bundan tashqari, O‘zbekiston Futbol Federasiyasi va Yaponiya Futbol Assosiasiyasi hakamlikni rivojlantirish va tajriba almashish borasida ham hamkorlik qiladigan bo‘ldi.
“Yaponiya Futbol Assosiasiya bilan kelishuvga erishilgani o‘zbek futboli uchun juda katta foydasi tegadi, deb ishonaman. Yaponiya kabi futboli rivojlangan mamlakatlar bilan yaqin hamkorlik qilish orqali O‘zbekiston Futbol Federasiyasi xodimlarining tajribasini va malakasini oshirish maqsad qilingan”, – deydi O‘FF prezidenti Umid Ahmadjonov.
