"Paxtakor" klubi matbuot xizmati 2017 yilgi mavsum yakunlarini sarhisobi va futbolchilar ko‘rsatkichlarini taqdim etishda davom etmoqda.

Ushbu mavsumda maydonda eng ko‘p vaqt o‘tkazgan futbolchilar uchligi Vladimir Kozak, Aleksandr Lobanov va Igor Sergeev bo‘ldi.

Jami 31 nafar futbolchi murabbiylar tomonidan maydonga tushirildi. Ulardan uch nafari birinchi davradan so‘ng jamoani tark etishdi - Adnan Oraxovas, Yurisa Bulyat va Xushnud Avilov.

Behruz Sa’dullayev atigi 12 daqiqa o‘ynagan bo‘lishiga qaramay, gol urishga ulgurgani e’tiborga molik. Eng ko‘p gol urish borasida Igor Sergeev o‘zini ko‘rsatdi. U raqiblar darvozasini 13 bor ishg‘ol qilishga erishdi. Bezerra ikkinchi davraning o‘zida 4 to‘p kiritdi. Nurullayev, Kozak va Simich esa uchtadan golni hisoblariga yozib qo‘yishdi.

Sariq kartochka olish borasida "rekordchi" Davron Hoshimov bo‘ldi. U hakamlar tomonidan 8 marta ogohlantirilgan bo‘lsa, Azim Ahmedov hisobida 7 sariq kartochka mavjud. Bir uchrashuvda ikki martadan sariq kartochka olib, maydondan chetlatilgan futbolchilar Lobanov va Tojiyev bo‘lishdi.

Eng yoshi katta futbolchi jamoa sardori Kamoliddin Tojiyev so‘nggi marta maydonga tushganda 34 yosh, 6 oy va 16 kunlik bo‘lgandi.

Eng yosh o‘yinchi sifatida Ibrohim G‘anixonov e’tirof etiladi. "Qizilqum"ga qarshi 3 mart kuni o‘tgan bellashuvda u 16 yosh, 7 oy va 16 kunlik edi. G‘anixonov oliy liga tarixida 2000 yilda tavallud topgan futbolchilar orasida birinchi marta maydonga tushgan o‘yinchi hisoblanadi.