Kecha, 30 noyabr kuni Moskvadagi “Gosudarstvenniy Kremlyovskiy dvores” saroyida JCH-2018 musobaqasining qur’a tashlash marosimi o‘tkazilishdan oldin eng yaxshi futbolchiga topshiriladigan sovrinning taqdimot marosimi o‘tkazildi.

“BUD Man of the Match” sovrini jahon chempionatida bo‘lib o‘tadigan har bir uchrashuvda eng yaxshi ishtirok etgan futbolchiga o‘yin yakunlangandan so‘ng topshiriladi.

Ta’kidlab o‘tish joizki, JCH-2018 musobaqasida jami 64 ta uchrashuvlar o‘tkaziladi. Futbolchilar 64 marta “BUD Man of the Match” sovrini bilan taqdirlanish imkoniyatiga ega bo‘lishadi.

Uchrashuvning eng yaxshi futbolchisini aniqlash butun dunyo futbol muxlislari tomonidan o‘tkazilgan so‘rovnoma natijasiga ko‘ra ma’lum bo‘ladi.

FIFA tashkiloti o‘yin yakunlangandan so‘ng tezkorlik bilan “O‘yinning eng yaxshi futbolchisi kim bo‘ldi?” tariqasida so‘rovnoma o‘tkazadi.

Muxlislar esa o‘zlari istagan futbolchini tanlash imkoniyatidan faqat bir marta foydalanishadi.

Shuningdek, “BUD Man of the Match” sovrinining taqdimot marosimida Angliya terma jamoasining sobiq darvozaboni Devid Simen va ikki karra jahon chempioni, Braziliya terma jamoasi sobiq himoyachisi Kafular ishtirok etishdi.

Eslatib o‘tamiz, bugun, 1 dekabr kuni Moskvada jahon chempionati final bosqichiga qur’a tashlash marosimi bo‘lib o‘tadi.