Madridning “Real” klubi qishgi transferlar mavsumida katta ehtimol bilan o‘z safini yangi darvozabon bilan kuchaytiradi.

“Marca” nashrining xabariga ko‘ra, Bilbaoning “Atletik” klubi darvozaboni Kepa Arrisabalaga qishda faoliyatini davom ettirish uchun “galaktikos” tarkibiga borib qo‘shiladi.

Ma’lum bo‘lishicha, “Real” klubi rahbariyati 23 yoshli darvozabonning “Atletik” bilan shartnomasida keltirib o‘tilgan 20 million yevroni to‘lashga tayyorliklarini bildirishgan.

Yosh iqtidorli posbon “Atletik” bilan amaldagi shartnomasini uzaytirmasligni aytib o‘tgan.

Madridliklar aynan shu vaziyatdan foydalanib, Kepaning agenti bilan muzokaralarni boshlab yuborishgan.

Muzokaralardan so‘ng transferning amalga oshishi deyarli 80 foizga “Real” tomoniga hal bo‘lishga ulgurgan bo‘lib, Arrisabalaganing o‘zi ham faoliyatini Madridda davom ettirishga qarshi emas.

Eslatib o‘tamiz, “Real” klubi “Manchester Yunayted” darvozaboni David De Xea transferi borasida muvaffaqiyatsizlikga uchragandan so‘ng boshqa darvozabon qidirish ishlarini boshlab yuborgandi.

Bundan tashqari, “qirollik klubi” rahbariyati jamoaning ikkinchi darvozaboni Kiko Kasilyani qishgi transferlar mavsumida sotib yuborishlari haqida avvalroq ma’lum qilib o‘tishgan edi.

Ta’kidlab o‘tish joizki, “Real”ning asosiy darvozaboni hisoblanmish, Keylor Navas jarohat olganidan so‘ng “Fuenlabrada”ga qarshi uchrashuvda maydonga qaytdi va o‘z darvozasidan 2 ta gol o‘tkazib yuborgandi.