Bugun O‘zbekiston kubogi finali, yil o‘yini hamda mamlakatimizdagi futbol mavsumini yakunlab beruvchi bahs bo‘lib o‘tadi.

Unda O‘zbekistonning amaldagi chempioni – “Lokomotiv” jamoasi OCHLga yo‘llanma olish uchun so‘nggi imkoni qolgan “Bunyodkor” bilan kuch sinashadi.

Amalda finaldagi mag‘lubiyat “temiryo‘lchilar” uchun hech qanday ma’noni anglatmaydi. Biroq “bunyodkorchi”larga bu uchrashuvdagi g‘alaba suv va havodek zarur.

Shuni alohida ta’kidlash kerakki, bugungi uchrashuv “Paxtakor” va “Nasaf” jamoalari uchun ham juda muxim. Ular “Lokomotiv”ga muxlislik qilishadi. Agarda “temiryo‘lchilar” finalda g‘alabaga erishadigan bo‘lsa, “Paxtakor” OCHL saralashida O‘zbekistonning 3-jamoasi sifatida yo‘l oladi va Iordaniya jamoasiga qarshi bahs olib boradi. “Nasaf” esa OCHL saralashida mamlakatimizning 2-jamoasi bo‘lib o‘ynaydi.

Agarda hal qiluvchi bahsda “Bunyodkor”ning qo‘li baland keladigan bo‘lsa, ular O‘zbekistonning 2-klubi bo‘lib, OCHLning 3-saralash bosqichida ishtirok etadi. “Nasaf” esa o‘z maydonida Iordaniya chempioni bilan uchrashadi. “Paxtakor” xalqaro maydondagi uchrashuvlardan benasib qoladi.

Ma’lumot uchun, O‘zbekistonning 2-jamoasi OCHLning 3-saralash bosqichida Qatar yoki Saudiya Arabistoni klubiga qarshi bahs olib boradi. 3-jamoamiz esa 2-saralash bosqichida Iordaniya klubini qabul qiladi. Agarda uchrashuvda g‘alabaga erishiladigan bo‘lsa, 3-saralash bosqichida yana bir qiyin uchrashuv bo‘lib o‘tadi.

Demak, bugungi O‘zbekiston kubogi finalida “Paxtakor” va “Nasaf” muxlislari “Bunyodkor”ning mag‘lubiyatini kutishi tabiiy.

“Bunyodkor” – “Lokomotiv” bahsi bugun soat 15:00 da Toshkentning “Bunyodkor” stadionida start oladi. Eslatib o‘tamiz, uchrashuvga kirish bepul!!!