Бугун Ўзбекистон кубоги финали, йил ўйини ҳамда мамлакатимиздаги футбол мавсумини якунлаб берувчи баҳс бўлиб ўтади.

Унда Ўзбекистоннинг амалдаги чемпиони – “Локомотив” жамоаси ОЧЛга йўлланма олиш учун сўнгги имкони қолган “Бунёдкор” билан куч синашади.

Амалда финалдаги мағлубият “темирйўлчилар” учун ҳеч қандай маънони англатмайди. Бироқ “бунёдкорчи”ларга бу учрашувдаги ғалаба сув ва ҳаводек зарур.

Шуни алоҳида таъкидлаш керакки, бугунги учрашув “Пахтакор” ва “Насаф” жамоалари учун ҳам жуда мухим. Улар “Локомотив”га мухлислик қилишади. Агарда “темирйўлчилар” финалда ғалабага эришадиган бўлса, “Пахтакор” ОЧЛ саралашида Ўзбекистоннинг 3-жамоаси сифатида йўл олади ва Иордания жамоасига қарши баҳс олиб боради. “Насаф” эса ОЧЛ саралашида мамлакатимизнинг 2-жамоаси бўлиб ўйнайди.

Агарда ҳал қилувчи баҳсда “Бунёдкор”нинг қўли баланд келадиган бўлса, улар Ўзбекистоннинг 2-клуби бўлиб, ОЧЛнинг 3-саралаш босқичида иштирок этади. “Насаф” эса ўз майдонида Иордания чемпиони билан учрашади. “Пахтакор” халқаро майдондаги учрашувлардан бенасиб қолади.

Маълумот учун, Ўзбекистоннинг 2-жамоаси ОЧЛнинг 3-саралаш босқичида Қатар ёки Саудия Арабистони клубига қарши баҳс олиб боради. 3-жамоамиз эса 2-саралаш босқичида Иордания клубини қабул қилади. Агарда учрашувда ғалабага эришиладиган бўлса, 3-саралаш босқичида яна бир қийин учрашув бўлиб ўтади.

Демак, бугунги Ўзбекистон кубоги финалида “Пахтакор” ва “Насаф” мухлислари “Бунёдкор”нинг мағлубиятини кутиши табиий.

“Бунёдкор” – “Локомотив” баҳси бугун соат 15:00 да Тошкентнинг “Бунёдкор” стадионида старт олади. Эслатиб ўтамиз, учрашувга кириш бепул!!!