Braziliya termasi birinchilardan bo‘lib Rossiyada o‘tadigan jahon chempionati yo‘llanmasini qo‘lga kiritdi. Albatta, bunda jamoa bosh murabbiyi Titening xizmatlari beqiyosdir.

Adenor Leonardo Bachi yoki oddiy qilib aytganda, Tite «pentakampeonlar»ni 2016 yilning iyunida qabul qilib olgandi. O‘sha davrlarda jamoa inqiroz yoqasiga kelib qolgandi.

Terma o‘z yurtida o‘tgan mundialdagi sharmandali natijadan so‘ng o‘ziga kela olmayotgandi. Tite qo‘l ostida Braziliya termasi dastlabki uchrashuvini Ekvadorga qarshi o‘tkazgandi.

Keyinchalik qatorasiga yetti o‘yinda g‘alaba qozongan jamoa birinchi bo‘lib JCH-2018 yo‘llanmasini qo‘lga kiritdi. Umuman olganda, Tite boshqaruvida bu terma 12ta o‘yin o‘tkazdi.

Shundan 10tasida g‘alaba qozongan bo‘lsa, yana ikki uchrashuvda durang qayd etdi. Yaqinda FIFA rasmiy sayti Tite bilan suhbat uyushtirdi.

- Agar faoliyatingizning eng yorqin xotiralari reytingini tuzsangiz, Braziliya termasining Parag­vay ustidan g‘alaba qozonib, JCH-2018 yo‘llanmasini naqd qilgan lahzalarini nechanchi o‘ringa qo‘yardingiz?

- Agar faoliyatimni 10 balli tizimda baholaydigan bo‘lsam, o‘sha lahzalarga 8 ball beraman. Mabodo jamoa­miz o‘z yurishini jahon chempionligi bilan yakunlasa, 10 ballga baholasa arziydi.

- O‘shanda o‘zingizni baxtli his qildingizmi?

- Dastlab yengil tortdim. Shundan so‘ng atrofga nazar solib, baxtli ekanimizga guvoh bo‘ldim. Bu Paragvay bilan o‘yinda boshlanib, Chiliga qarshi uchrashuvdan so‘ng nihoyasiga yetdi.

Chunki biz xarakter ko‘rsatib, saralash turnirida ishtirok etayotgan boshqa jamoalarga hurmatimizni namoyon etdik.

- Bir necha oy oldin Marselo «Biz Titedan minnatdor bo‘lishimiz kerak. Chunki u barchasini o‘zgartirib yubordi», degandi. Aynan nimani o‘zgartirdingiz?

- Umuman olganda, Marseloning gaplarini to‘g‘ri talqin qilish kerak. Aslida barchasiga futbolchilarning mehnatlari evaziga erishdik.

To‘g‘ri, natija uchun men javob beraman. Shtabimiz bilan amalga oshirgan ishlarimiz o‘z samarasini berganidan xursandman.

- Braziliya termasi Rio Olimpiadasida oltin medallarni qo‘lga kiritdi. Bu jihat jamoaga qanchalik yordam berdi?

- Olimpiya o‘yinlari Neymar, Markinyus, Gabriel Jezus va Renato Augusto kabi futbolchilarning tajribalari oshishida ancha yordam berdi.

Yakunda ular Braziliya milliy jamoasining bir bo‘lagiga aylanishdi. Aynan shu futbolchilar olimpiyachilarning bosh sovrinni qo‘lga kiritishlarida muhim rol o‘ynashdi.

- Bunday yuqori darajani bir necha oy ushlab turishga qanday erishyapsiz?

- Iloji boricha terma o‘yinlari payti yuqori saviyasini ushlab turgan futbolchilarni chaqirishga urindik. Bunda natija haqida o‘ylamadik. Jamoani raqobatbardosh qilish payida bo‘ldik.

- Neymar bilan ishlash qanday kechdi?

- Uning bir o‘zini vaziyatga mas’ul qilish yaramaydi. Har bir futbolchi bilan suhbatda tegishlicha vazifalarni tushuntirishga harakat qildim. Tarkibda jahonning eng yaxshi uch o‘yinchisidan biri bo‘lsa, bu omadingiz kelganidan darakdir.

- Neymarning muxlislar bilmaydigan jihatlari bormi? DAVOMI