O‘zbekiston milliy terma jamoasi Marokash milliy terma jamoasiga qarshi o‘rtoqlik o‘yini o‘tkazish bo‘yicha kelishuvga erishdi. Uchrashuv 2018 yilning 27 mart kuni Marokashning Kasablanka shahrida bo‘lib o‘tadi.
2018 yilda Rossiyada bo‘lib o‘tadigan Jahon chempionati oldidan FIFA kunlari faqat mart oyida mavjud.
Tabiiyki, bu kunlarda JCH yo‘llanmasini qo‘lga kiritgan jamoalar kuchli raqiblarga qarshi bahs olib borishga harakat qilishadi.
O‘zbekiston futbol federasiyasi tarixda birinchi marta bevosita Jahon chempionati oldidan mundial qatnashchisi bilan o‘rtoqlik o‘yini o‘tkazish bo‘yicha kelishuvga erishdi.
Ma’lumot uchun, Marokash terma jamoasi 2018 yil Rossiyada bo‘lib o‘tadigan Jahon chempionatiga yo‘llanmani qo‘lga kiritgan bo‘lib, “B” guruhida Portugaliya, Ispaniya va Eron terma jamoalariga qarshi bahs olib boradi.
Fransiyalik mutaxassis Erve Renar shogirdlari JCH saralashining “S” guruhidagi so‘nggi o‘yinda Kot d‘Ivuar terma jamoasini 2:0 hisobida mag‘lubiyatga uchratib, mundial yo‘llanmasini qo‘lga kiritgan. So‘nggi bor marokashliklar 1998 yil Fransiya jahon chempionatida qatnashgan. Marokash terma jamoasi tarkibida Mexdi Benatiya, Muborak Bussufa, Nabil Dirar kabi mashhur futbolchilar to‘p suradi.
