Kataloniyaning “Barselona” klubi hujumchisi Lionel Messi “Real” klubiga qarshi uchrashuv oldidan o‘z fikrlarini bildirib o‘tdi.

Argentinalik futbolchining so‘zlariga ko‘ra, “Santyago Bernabeu”da o‘tadigan o‘yin natijasi u uchun juda muhim hisoblanadi.

“Klasikoda g‘alaba qozonish boshqacha kayfiyat ulashadi. Ayniqsa, “Santyago Bernabeu” stadionidan g‘alaba bilan qaytish juda ham muhim.

“Real” ustidan qozoniladigan g‘alaba bizga chempionatda katta imkoniyatlar eshigini ochadi. Bu haqda avval jamoadoshim Andres Inyesta ham ta’kidlab o‘tgandi.

To‘g‘ri, “Real” hozir musobaqa jadvalida ikkinchi o‘rinda emas, bizga katta raqobat ko‘rsata olmayapti.

Lekin baribir yangi yilga g‘alaba qozonib o‘tishni istayapmiz va bu maqsad yo‘lida bor kuchimizni ishga solamiz”, deydi Messi.

Ma’lumot uchun, “Barselona” Ispaniya chempionatining 16 turidan so‘ng 42 ochko jamg‘argan holda musobaqa jadvalini boshqarib bormoqda.

“Real” esa 31 ochko bilan (bitta zaxirada o‘yini bor) 4-o‘rinni egallab turibdi.

Eslatib o‘tamiz, “Real” – “Barselona” uchrashuvi 23 dekabr, shanba kuni Toshkent vaqti bilan soat 17:00 da boshlanadi.