Ravshan Haydarov bosh murabbiyligidagi O‘zbekiston U-23 terma jamoasi 19 dekabrdan boshlab Toshkent shahrida o‘quv-mashg‘ulotlar yig‘inini o‘tkazayotgani haqida xabar berib o‘tgandik.
Yanvar oyida bo‘lib o‘tadigan Osiyo chempionatiga tayyorgarlik ko‘rayotgan Ravshan Haydarov shogirdlari bugun Qarshi shahrida milliy chempionatimiz kumush medali sovrindori "Nasaf" klubiga qarshi ikkita nazorat uchrashuvi o‘tkazadi. Dastlabki o‘yin bugun soat 17:00da boshlanadi. Stadionga kirish bepul. "Nasaf" klubiga qarshi ikkinchi nazorat uchrashuvi ertaga Qarshi shahrida bo‘lib o‘tadi.
Mazkur nazorat o‘yinlari orqali Yoshlar terma jamoasi bosh murabbiyi Ravshan Haydarov yangi taktik uslullarni sinovdan o‘tkazib, tarkibdagi barcha futbolchilarning jismoniy holatini yana bir bor ko‘zdan kechirib oladi.
Eslatib o‘tamiz, O‘zbekiston U-23 termasi 2018 yilning yanvar oyida Xitoyda bo‘lib o‘tadigan Osiyo chempionatida ishtirok etadi. Qur’a natijasiga ko‘ra, vakillarimiz “A” guruhidan joy olgan bo‘lib, guruh bosqichida Xitoy, Qatar va Ummon terma jamoalari bilan kuch sinashadi.
