O‘rtoqlik uchrashuvi yakuniga yetgach, U-23 terma jamoamiz ustozi Ravshan Haydarovning bugungi o‘yin haqidagi fikrlari bilan qiziqdik.
-Avvalom bor, bugungi o‘yinni tashkil qilib bergan “Nasaf” klubi rahbariyatiga, alohida Ro‘ziqul Sa’dullayevichga katta minnatdorchiligimni bildiraman. Albatta bor yo‘g‘i bir hafta mobaynida faqat jismoniy tiklanish ustida ishlayotgan jamoaning o‘yini yetarli darajada bo‘lmaydi. Biz esa bir oy mobaynida uzluksiz o‘yin amaliyotiga ega bo‘lib turibmiz. Bu hammaga tushunarli. Bu uchrashuv ko‘proq biz uchun muhim edi. Biz bejizga sparring raqib sifatida “Nasaf”ni tanlamadik. Bunga bugun ham qaytadan amin bo‘ldik. Jamoada yuqori mahoratga ega futbolchilar jamlangan. Bu jamoa har bir o‘yinda yuqori saviyadagi o‘yin namoyish etadi va raqibini ham yuqori darajada o‘ynashga majbur qila oladi. O‘zingizga ma’lum, yaqinda Tailandda bo‘lgan xalqaro musobaqada qatnashib qaytdik. Bunday saviyadagi musobaqa ishtirokidan so‘ng, to‘xtab qolishimiz mumkin emas edi. Shuning uchun biz, nazorat sinov uchrashuvini o‘tkazish uchun “Nasaf”ga iltimos qildik. Bugungi o‘yin mazmunli va muxlislarbop o‘yin bo‘ldi deb, ayta olaman.
Albatta bunday uchrashuvlarda hisob hech qanday ahamiyatga ega emas. Muhimi, katta musobaqa oldidan biz uchun foydasi katta bo‘ladi.
Yakuniy tarkib bo‘yicha yakuniy qaror? Albatta bunday nazorat uchrashuvlari bir tomondan ko‘p narsaga oydinlik kiritsa, ikkinchi tomondan savollar ham paydo qiladi. Hali tayyorgarlik jarayoni davom etmoqda. Biz hozir jamoaga 23 nafar futbolchini jalb qilgan bo‘lsak, 5-6 nafar zaxira nomzodlarimiz bor. Masalan, bugungi o‘yinda darvozabon Umidjon Ergashev o‘z o‘yini bilan terma jamoamizga davogar ekanligini ko‘rsatdi. Buni ko‘rib to‘g‘risi juda xursand bo‘ldim. Chunki, bizga qanchalik tanlov katta bo‘lsa, shunchalik imkoniyatimiz ham oshadi. To‘g‘ri, hozirgi darvozabonlarimizga hech qanday e’tirozim yo‘q, ammo ertaga nima bo‘lishini bilmaymiz. Shu jihatdan biz har qanday vaziyatga tayyor turishimiz kerak bo‘ladi.
Imkoniyatimiz qanday? Biz bu tarkib bilan ko‘pdan buyon birgamiz, bu jamoa oldiga katta maqsad qo‘ysa bo‘ladi. Yigitlarimiz ham shu darajaga yetib kelishdi. Ular endi o‘z oldilaridagi katta vazifasini ado etishlari qoldi. Yigitlarimizni jismoniy va taktik jihatdan yuqori darajadagi o‘yin namoyish etishga loyiq, deb o‘ylayman. Maqsadimiz yuqori. Ishonamanki, bo‘lajak musobaqada jamoamiz yurtimiz sha’nini munosib himoya qiladi.
