Kecha “Metallurg” klubining Chirchiqda o‘tkazilgan yig‘ilishida jamoa bosh murabbiyi bo‘lib ishlab kelgan tajribali mutaxassis Rustam Mirsodiqov iste’fo berganligini e’lon qilgandik. Bugun esa “Zerom” mehmonxonasida jamoaning yangi bosh murabbiyini tanishtiruv marosimi bo‘lib o‘tdi. Shu kungacha “Paxtakor” jamoasida jismoniy tayyorgarlik bo‘yicha bosh murabbiy yordamchisi bo‘lib ishlab kelgan Andrey Shipilov “Metallurg” futbolchilariga klubning yangi bosh murabbiyi sifatida tanishtirildi.
Ma’lumot uchun: Andrey Sergeevich Shipilov 1971 yil 23 mart kuni tavallud topgan. Uzoq yillar mamlakatimiz va xorij jamoalarida himoyachi, yarim himoyachi amplualarida to‘p surgan. Futbolchilik faoliyatini 1990 yilda Toshkent viloyatining “Sverdlovchi” jamoasida boshlab (74 uchrashuv), keyinchalik “Traktor” (1992 yil, 13 uchrashuv – 1 ta gol), “Chirchiq” (1992, 12), Andijonning “Navro‘z” (1993, 27-1), Sirdaryoning “Guliston” (1994, 2) jamoalarida o‘ynagan. 1994 yilda Rossiya Federasiyasidan taklif tushgach, “Torpedo” (Vladimir, 1994, 8), “Metallurg” (Novotroisk, 1994, 4), “Nosta” (Novotroisk, 1995-96, 40) jamoalarida to‘p surgan. 1997 yildan yana mamlakatimizga qaytib kelgan Andrey Shipilov “Andijon” (1997-2000, 111-9), “Navbahor” (2001, 3), “Andijon” (2001-2002, 26) jamoalarida o‘ynadi. Bir mavsum Rossiyaning “Vidnoye” (2003, 17-1) jamoasi tarkibida bo‘lib qaytgach, futbolchilik faoliyatini 2003 yili Toshkent viloyatining “Do‘stlik” jamoasida yakunlagan.
Andrey Shipilov “Metallurg” PFK bosh murabbiyi etib tayinlanguniga qadar Toshkentning “Paxtakor” jamoasida bosh murabbiy yordamchisi bo‘lib ishlab kelayotgandi. U shuningdek, 2015-2017 yillar oralig‘ida O‘zbekiston milliy terma jamoasida ham jismoniy tayyorgarlik bo‘yicha bosh murabbiy yordamchisi vazifasida xizmat qilgan.
Tanishtiruv marosimi yakunlangach “Kimyogar” stadionida Andrey Shipilov boshchiligida birinchi mashg‘ulot bo‘lib o‘tdi. Avvaliga sport zalida yengil jismoniy tayyorgarlik mashqalaridan keyin futbolchilar stadionda yugurish, to‘p bilan ishlash jarayonlarini o‘tashdi. Bekobodliklar 30 dekabr sanasiga qadar Chirchiq shahrida har kuni bir mahaldan jismoniy tayyorgarlik mashqlarini davom ettirishadi.
"Metallurg" PFK matbuot xizmati
