O‘zbekiston U-22 yoshlar termasi Xitoyda bo‘lib o‘tadigan Osiyo chempionati final bosqichi bahslari oldidan ilkmashg‘ulotini o‘tkazdi.

Xitoyning Changjou shahrida bo‘lib turgan O‘zbekiston yoshlar terma jamoasi bugun mahalliy vaqt bilan soat 20:00da boshlangan mashg‘ulotlarda asosan chigalyozdi hamda chiniqish mashqlariga e’tibor qaratdi. Shuningdek, terma jamoa mashg‘ulotlar paytida to‘p bilan ishlash, jismoniy mashqlarga ham ko‘p e’tibor berdi. Havo harorati biroz sovuq bo‘lishiga qaramay, mashg‘ulotlar samarali tarzda kechdi.

Ta’kidlash lozim, O‘zbekiston yoshlar terma jamoasi OFK tomonidan tasdiqlangan jadval asosida, ertaga uchrashuv bo‘lib o‘tadigan Changjoudagi stadionda rasmiy mashg‘ulotini o‘tkazadi. Ravshan Haydarov bosh murabbiyligidagi yoshlar terma jamoasi shuningdek, trenajer zallarida jismoniy yuklamalar bo‘yicha shug‘ullanmoqda.

Ma’lumot uchun, 8 yanvar kuni terma jamoa vakillari ishtirokida turnir oldidan miting hamda terma jamoalar bosh murabbiylari ishtirokida matbuot anjumani o‘tkaziladi.

Changjou, Xitoy.

O‘FF matbuot xizmati.