"Qo‘qon-1912" futbol klubining o‘rinbosarlar tarkibi yangi mavsumga jiddiy tarzda tayyorgarlik ko‘rmoqdalar.
Muhsin Nizomiddinov boshchiligidagi murabbiylar shtabi ko‘plab yosh futbolchilarni ko‘rikdan o‘tkazmoqdalar. O‘tgan mavsumda bronza medallarini qo‘lga kiritgan yoshlarimizdan , bu yil ham muxlislarimiz yaxshi natija kutishlari tabiiy hol. Buning uchun murabbiylarimizdan katta mehnat talab qilinadi.
Bugun Qo‘qondagi "Kimyogar" stadionida M Nizomiddinov shogirdlari nazorat o‘yinini o‘tkazishdi. Raqib sifatida tajribali Bahrom Hakimov boshchiligidagi Yaypanning "Turon" jamoasi tanlab olingan edi. Uchrashuv qiziqarli va tomoshabop tarzda o‘tdi. Dastlab Yaypanlik futbolchi Asadbek Komilov hisobni ochgan bo‘lsa, 2-taymda Abror Rahmonov penaltidan gol kiritib o‘rtadagi muvozanatni tikladi. Shundan keyin har ikkala jamoa vakillari harchand urinishmasin darvozalarga boshqa to‘p kiritilmadi. Uchrashuv 1-1 hisobidagi durang natija bilan yakunlandi.
Muhsin Nizomiddinov bugungi bahsda jamoa ko‘rigida bo‘lib turgan 30 dan ortiq futbolchilarga o‘ynash imkoniyatini berganligini alohida ta’kidlash lozim.
O‘rtoqlik uchrashuvi.
"Qo‘qon-1912" (o‘rinbosarlar) - "Turon" (YAypan) 1-1.
