Kelayotgan mavsumda xalqaro maydonda mamlakatimiz sharafini 3ta klub himoya qiladi. Osiyo Chempionlar ligasi-2018da “Lokomotiv” ishtirokini guruh bosqichidan boshlasa, “Nasaf” hamda “Paxtakor” klublari pley-off bosqichida o‘z kuchlarini sinab ko‘rishlari lozim bo‘ladi.

Ayni paytda har uchala klub ham nufuzli musobaqaga qizg‘in tayyorgarlik olib bormoqda. Xususan, O‘zbekiston chempioni va kubogi sohibi “Lokomotiv" 9 yanvardan BAAning Dubay shahrida o‘quv-mashg‘ulot yig‘ini boshladi. “Temiryo‘lchilar” Dubayda 23 yanvarga qadar yig‘in o‘tkazadi va kuniga 2 mahaldan mashg‘ulotlar olib boradi. “Loko” shuningdek mazkur yig‘in davomida 4ta nazorat bellashuvi o‘tkazishni ham rejalashtirgan.

Qarshining “Nasaf” klubi ham 9 yanvardan e’tiboran qishki o‘quv-yig‘in mashg‘ulotlarini xorijda davom ettirmoqda. Qarshiliklar Turkiyaning Belek shahrida 22 yanvargacha shug‘ullashadi. Murabbiylar shtabi Turkiyaga 23 nafar futbolchini olib ketishdi. Xorijiy yig‘in davomida ham safga yangi futbolchilar qo‘shilishi kutilmoqda. “Nasaf” 23 yanvar kuni Qarshiga qaytib keladi va 30 yanvarda bo‘ladigan pley-off uchrashuviga tayyorgarlikni uyda davom ettiradi.

Yana bir pley-off bosqichida qatnashadigan klubimiz – “Paxtakor” esa 3 yanvar kuni Belekda yig‘in boshladi. “Sherlar”ning ushbu xorij yig‘ini 21 yanvargacha davom etadi. Yig‘inga 25 nafar futbolchi olib ketgan “Paxtakor” 4ta nazorat bellashuvida maydonga tushishni rejalashtirgan. Ularning dastlabkisida “Paxtakor” Turkiya uchinchi liga ishtirokchisi “Turgutluspor”ga qarshi maydonga tushdi va 3:0 hisobida zafar quchdi.