2017 yilning ikkinchi yarmi «Milan», ayniqsa, uning yangi sardori Leonardo Bonuchchi uchun juda omadsiz o‘tdi.
Yozgi transferlar mavsumida katta xarajat qilgan klub buning samarasini hali ko‘rganicha yo‘q, «Yuventus» safida sovrinlarga ko‘milgan himoyachi esa Milanda ishonchni sira oqlamayapti.
Ammo u yaqin kelajakka katta umid bilan qaramoqda. Leonardo xususan, klub jurnali muxbirlari bilan suhbat chog‘i yangi yilda hammasi izga tushishidan umidvor ekanligini alohida ta’kidladi.
- Avvalo, Rojdestvo bilan bog‘liq ilk xotiralaringizni esga olsak...
- Bu bayramni har doim oila davrasida, ota-onam bilan o‘tkazardik. Odatda uyimizda 20-25 kishi to‘planardi va 3 kun davomida stol atrofidan ketmasdik: tinmay ovqatlanardik, o‘ynab-kulardik (kuladi). Qisqasi, Rojdestvo - oilaviy bayram. Ammo ulg‘aygan sari oilam va yaqinlarimga yetarli vaqt ajratolmay qoldim.
Shu bois, oxirgi yillarda bayramni ba’zi-ba’zida birga nishonladik, xolos. Asosan yozgi ta’til vaqti birga dam olamiz. Futbolchining hayoti juda go‘zal, ammo ko‘pincha ko‘p narsadan voz kechishingga to‘g‘ri keladi.
Shuningdek, charchoq alomatlarini yo‘qotish uchun dam olishing kerak. Xullas, Rojdestvo munosabati bilan berilgan 5-6 kunlik ta’tilni ham imkon qadar osuda o‘tkazishga intildim.
- Bu safar Italiyada hattoki, bayram kunlariga ham o‘yinlar belgilandi. Ushbu g‘oyaga qanday qaraysiz?
- Bayram kunlari o‘ynash qiziqish uyg‘otdi. Ochig‘i, futbolchilar bu g‘oyani qo‘llab-quvvatlashlari kerak. Axir odamlar oila bo‘lib, stadionga talpinishadi. Shunga mos ravishda chiroyli o‘yin ko‘rsatilsa, bas. Umuman, bunday taqvim chempionat foydasiga ishlashi mumkin.
Deylik, Angliyada futbolchilar Roj-destvo kunlari deyarli har 48 soatda maydonga tushishadi. O‘ylashimcha, mazkur yangilik muxlislarda futbolga qiziqishni yanada oshiradi.
- Joriy mavsum siz uchun omadsiz davom etyapti. Eslasak, «Yuventus»dagi debyut mavsumda ham ishlaringiz uncha yurishmagandi...
- Ha, mavsum ko‘p jihatlari bilan o‘sha davrni esga solyapti. Startdagi katta ishtiyoq, ko‘plab yangi futbolchilar... Bitta farq bor - boshlanish marrasi. Chunonchi, «Yuve» dekabr oyida yetakchilar safida edi. Tushunish qiyin holat esa yanvarda boshlangan.
«Milan» esa start chizig‘idayoq muammolar girdobida qoldi. Yangi jamoa tuzish oson emas, albatta. Demoqchimanki, bizga o‘zaro tushunib o‘ynashni izga solish uchun vaqt yetishmadi, omad ham... Ammo ishonchim komil, «Milan»ni o‘ziga munosib mavqega olib chiqamiz hali.
- Futbolchi uchun nima muhimroq: fikrlashmi yoki jismoniy tayyorgarlik? Gattuzoning baholashicha, ikki jihatning nisbati teng - 50ga 50.
- Menimcha, og‘ir vaziyatlarda fikr yuritish muhimroq. Ha, tan olaman, «Milan»dagi faoliyatimni miyam turli g‘oyalarga to‘lib ketgani va jismoniy tayyorgarligim yuqori emasligi tufayli anchayin og‘ir boshladim.
Diskvalifikasiyadan so‘ng har ikki yo‘nalishda alohida ish olib bordim va shundan keyingina o‘z darajamga yaqinlashdim. Umuman olganda, Gattuzoning fikriga qo‘shilaman: fikrlash va jismoniy kuch birdek muhim. Ammo murakkab vaziyatlarda aynan fikrlash tezligi maqsadga yetishda qo‘l kelishini unutmaslik kerak.
- Odatda maydonda bor diqqatni o‘z ishingizga qaratasiz. Uyga qaytgach, o‘yin yoki mashg‘ulotni uzoq tahlil qilasizmi yoki...?
- Hammasi natijaga bog‘liq (kuladi). So‘nggi paytlar tahlilga ko‘p vaqt ketyapti. Zero, avvalo, o‘zim yaxshi o‘ynamoqchiman, shu asnoda jamoaga kutilgan darajada yordam berishim mumkin. Avvallari asosan salbiy jihatlarga ko‘proq e’tibor qaratardim.
Hozir esa muayyan vaziyatlarda yanada aniqroq va mas’uliyatliroq to‘p surishim mumkin bo‘lgani haqida o‘ylayman. To‘g‘ri, bir necha soatdan keyin hammasini unutaman. Axir keyingi bahs muhimroq sanaladi. Umuman, o‘yindan so‘ng uxlashim juda qiyin...
- Aytingchi, qanday otasiz, farzandlaringizga yetarli vaqt ajrata olyapsizmi?
- Turmush o‘rtog‘imning aytishicha, o‘ta qattiqqo‘lman. U bolalarimizga shundoq ham kam vaqt ajratayotganimni ta’kidlab, yumshoqroq munosabatda bo‘lishim kerakligini tez-tez takrorlaydi. Ammo ularga o‘zim voyaga yetgan muhitdan kelib chiqqan holda tarbiya berishni ma’qul ko‘raman.
Farzandlarim munosib ta’lim olishlari, hammasiga e’tiborli bo‘lgan holda, turli sinovlarga tayyor turishlarini xohlayman. Birga dam olish va o‘ynash imkoni topilganida esa, har doim darvozadan joy olaman. Ular shunda gol urib, xumordan chiqishadi (kuladi).
- Futbol sizga nima berdi-yu, nimalardan mahrum qildi?
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
