Kecha O‘zbekiston Milliy olimpiya qo‘mitasi majlislar zalida navbatdan tashqari hisobot-saylov bosh Assambleyasi bo‘lib o‘tdi.
Kun tartibidagi asosiy masala Milliy olimpiya qo‘mitasiga yangi prezident saylash va Qo‘mitaning vise-prezidentlari hamda Ijroiya Qo‘mitasi tarkibini tasdiqlashdan iborat bo‘ldi.
Yig‘ilishda O‘zbekiston Respublikasi Bosh vaziri Abdulla Aripov, Jismoniy tarbiya va sport Davlat Qo‘mitasi raisi, sport federasiyalari va viloyatlardagi sport tashkilotlari rahbarlari ishtirok etishdi.
Shu paytga qadar Milliy olimpiya qo‘mitasi prezidenti sifatida faoliyat yuritgan Alisher Sultonov boshqa ishga o‘tgani munosabati bilan MOQ yangi prezideti sifatida O‘zbekiston futbol federasiyasi prezidenti Umid Ahmadjonov saylandi.
Milliy olimpiya qo‘mitasining yangi vise-prezidentlari Murod Azimov, Alisher Sultonov, Oybek Qosimov va Salim Abduvaliyev bo‘lishdi.
Milliy olimpiya qo‘mitasining yangi prezidenti Umid AHmadjonov yig‘ilishda so‘zga chiqar ekan, quyidagi fikrlarni bildirib o‘tdi.
"Avvalom bor, Muhtaram Prezidentimiz tomonlaridan bildirilgan ushbu yuksak ishonch uchun chuqur minnatdorchiligimni bildiraman.
Bildirilgan ishonchni oqlash uchun bor kuch va g‘ayratimni ishga solishga va’da beraman. Birgalikda O‘zbekistonda Olimpiya sport turlarini rivojlantirib, yaratib berilayotgan sharoitlardan unumli foydalangan holda, 2020 yilda Tokioda bo‘lib o‘tadigan Yozgi Olimpiya o‘yinlarida yuqori natijalarni qo‘lga kiritish uchun astoyidil harakat qilamiz.
Yurtboshimizni sportchilarga ko‘rsatayotgan e’tibor va g‘amxo‘rliklariga javoban, biz Prezidentimiz farzandlari Vatanimiz sharafini xalqaro sport arenalarida munosib himoya qilishga va nufuzini yanada oshirishga, erishgan yutuqlarimiz bilan xalqimiz va Yurtboshimizni xursand qilishga va’da beramiz", - dedi Umid Ahmadjonov.