Xitoyda bo‘lib o‘tgan U-23 Osiyo chempionatida g‘alaba qozonib, chempionlikka erishgan O‘zbekiston terma jamoasi a’zolari kecha tunda yurtimizga qaytib kelishdi.

Poytaxtimizdagi “O‘zbekiston” mehmonxonasida chempionlarni taqdirlash marosimi bo‘lib o‘tdi. Marosimda O‘zbekiston Respublikasi Bosh vaziri Abdulla Aripov, O‘zbekiston futbol Assosiasiyasi 1-vise prezidenti Umid Ahmadjonov, mutasaddi shaxslar, Yoshlar Ittifoqi yetakchilari, estradamiz yulduzlari, ommaviy axborot vositalari vakillari va muxlislar ishtirok etishdi.

O‘zbekiston Respublikasi Bosh vaziri Abdulla Aripov O‘zbekiston Olimpiya terma jamoasi a’zolari va murabbiylariga O‘zbekiston Respublikasi Prezidenti Shavkat Mirziyoyevning tabrigini o‘qib eshittirdi. So‘ngra futbolchilar va murabbiylar shtabi a’zolariga Prezident sovg‘alari - Chevrolet Malibu rusumidagi avtomobillar topshirildi.

O‘zbekiston futbol Assosiasiyasining 1-vise prezidenti Umid Ahmadjonov O‘zbekiston Olimpiya terma jamoasi vakillarini chempionlik bilan tabriklar ekan, haqiqiy vatanparvarlarga xos bo‘lgan matonatli va shijoatli o‘yin uchun ularga minnatdorlik bildirdi.

O‘zbekiston Olimpiya terma jamoasi a’zolari nomidan esa Javohir Sidiqov so‘zga chiqib, yuksak e’tibor uchun tashakkur bildirdi va kelgusida ham xalqaro musobaqalarda O‘zbekiston sharafini munosib himoya qilishga so‘z berdi.

E’tiboringizga chempionlarni kutib olish va taqdirlash marosimidan to‘liq videolavhalarni taqdim etamiz.

Reportajning 2-qismi