Bugun “Al Faysaliy” klubi vakillari ishtirokida o‘yinoldi matbuot anjumani bo‘lib o‘tdi. Matbuot anjumanida jamoa murabbiyi Neboysa Yoyovich va jamoa sardori Xalil Baniatiyah hamda Yusuf Ravshdehlar ishtirok etishdi. Mehmonlar jurnalistlarning qiziqtirgan savollariga javob berishdi. Matbuot anjumani juda qisqa davom etdi.

Neboysa Yoyovich: -Biroz qiyinchiliklar bilan Qarshiga ham yetib keldik, biz bugun imkon darajasida yaxshi o‘yin ko‘rsatishga harakat qilamiz va iordaniyalik futbol ishqibozlari uchun o‘ynaymiz. Afsuski tarkibimizda yo‘qotishlar ham bor. 24 yanvar kuni “Al Yarmuk” bilan bo‘lgan uchrashuvda 9-raqamdagi o‘yinchimiz Axmad Hayol Ibrohim jarohat olgan. Bu futbolchimiz xizmatidan bugun foydalana olmaymiz. Biz bugun har qanday o‘yin jarayoniga tayyor holda maydonga tushamiz. Hammasi e’tiborga olingan.

Yusuf Ravshdeh: -Biz o‘yinga yaxshi tayyorgarlik ko‘rdik, ishqibozlarimiz uchun yaxshi o‘yin ko‘rsatishga harakat qilamiz.

Xalil Baniatiyah: -Biz bugun Iordaniya uchun o‘ynaymiz. Bizni Qarshida munosib kutib olishdi, bizga ko‘rsatgan katta hurmat va ehtiromlari uchun “Nasaf” klubi rasmiylariga, jamoadoshlarim nomidan tashakkur bildiraman.