Xabaringiz bor bugun “Paxtakor” hamda “Nasaf” jamoalari OCHL-2018 saralash baxslarini o‘tkazishadi. “Paxtakor” Doxada “Al-Garafa”ga qarshi maydonga tushsa, “Nasaf” Qarshida “Al Faycaliy” jamoasini qabul qiladi.
Biz muhim uchrashuvlar oldidan jamoalarimiz haqida jurnalistlar fikrini so‘radik.
Elmurod Ermatov (Kun.uz muhbiri)
"Nasaf" qiyinchilik bilan g‘alaba qozonsa kerak deb o‘ylayman. Futbolchilarda o‘yin amaliyoti yuq. Yaxshi o‘yinchilar esa jamoani tark etdi. Lekin, jamoaning ustun tomoni bu murabbiy. Berdiyev ancha tajribali mutaxassis. Agar futbolchilar murabbiyning ko‘rsatmalariga to‘liq rioya qilishsa, hammasi yaxshi bo‘ladi. "Paxtakor"ni esa mehmonda judayam qiyin o‘yin kutmoqda. Umid qilamizki Arveladze shogirdlari bizni uyaltirib qo‘yishmaydi.
Shohjahon Karimov (sport jurnalisti)
To‘g‘risini aytsam “Paxtakor”ning o‘yinini intizorlik bilan kutyapman. Mening fikrimcha “Paxtakor” guruh bosqichga yul oladi. Lekin raqib ham osonlikcha taslim bo‘ladiganlardan emas. Sneyderning “Al Garafa” safiga qo‘shilishi raqib jamoani yanada kuchaytirgani shubhasiz. Menimcha “Paxtakor” minimal hisobda g‘alaba qozonadi, g‘alaba to‘pini esa Jaloliddin Mashripov kiritadi deb o‘ylayman.
Akmal Eshonxonov (sport jurnalisti)
Men ham barcha yurtdoshlarimiz singari “Paxtakor”ni keyingi bosqichga chiqishidan umidvorman. “Sherlar” tarkiblarini tajribali va kuchli futbolchilar bilan kuchaytirishdi. “Paxtakor” hech bo‘lmaganda guruh bosqichiga yo‘l olishi kerak. Albatta, shu barobarin ulardan guruhdan chiqish vazifasi talab etiladi.
"Nasaf" haqida nima deya olaman? Qarshiliklar "Al Faysaliy"ga qarshi uchrashuvda biroz qiyinchilikka uchrashi mumkin. Hech qachon “Nasaf”ga mag‘lubiyat tilamagan bo‘lardim, ammo bir qator tajribali futbolchilaridan ayrilgan "Nasaf"ga bugun Qarshining qorlari omad keltirsin. Eng asosiysi, "Nasaf", "Paxtakor" yoki "Lokomotiv" jamoasi bo‘ladimi O‘zbekiston nomini doim olam uzra taratib yurishsin. Shu jumladan biz jurnalistlar ham barcha futbol ishqibozlari uchun tunu-kun mehnat qilishda davom etamiz.
Dildora Xolboyeva (“So‘g‘diyona” matbuot kotibasi)
Muhimi, yoshlarimiz yilni g‘alaba bilan boshlab berishdi. Yurtimizga futbol havosini qaytarishdi. Har qanday klub bo‘lmasin OCHLda vatanimiz shanini munosib ximoya qilishadi degan umiddaman.
Har ikkala jamoaga ham shaxsan o‘zim, qolaversa, “So‘g‘diyona” jamoasi rahbariyati, murabbiylari, futbolchilari va barcha xodimlari nomidan Omad tilaymiz. Umid qilamizki, futbol bayramini Qatar va Qarshida davom ettiramiz.
