O‘zbekiston Milliy Olimpiya qo‘mitasi prezidenti va O‘zbekiston Futb  Assosiasiyasi 1-vise-prezidenti Umid Ahmadjonov bugun viloyatdagi olimpiya sport turlari va futbolni rivojlantirish borasida amalga oshirilayotgan ishlar bilan tanishish maqsadida Andijonga tashrif buyurgani haqida avval xabar berib o‘tgandik.

Kunning ikkinchi yarmida Umid Ahmadjonov Qo‘qonga tashrif buyurib, “Qo‘qon-1912” klubiga qarashli “Markaziy” stadionda amalga oshirilayotgan rekonstruksiya ishlari bilan tanishdi.

O‘FA 1-vise-prezidenti Superliganing yangi mavsumi boshlangunga qadar stadiondagi qayta ta’mirlash ishlarini tezroq yakuniga yetkazish kerakligini ta’kidlab, bu borada tegishli ko‘rsatmalar berib o‘tdi.

Shuningdek, Umid Ahmadjonov stadionda “Qo‘qon-1912” klubi muxlislar jamoasi bilan ham uchrashdi. Qo‘qonlik muxlislarning yangi mavsumga o‘z jamoalarini qo‘llab-quvvatlash uchun qay darajada tayyorgarlik ko‘rishayotgani bilan qiziqdi. OCHLdan o‘rin olgan “Nasaf” ishtirokidagi safardagi o‘yinlarga qo‘qonlik eng faol 10 nafar muxlisni O‘zbekiston Futbol Assosiasiyasi hisobidan yuborilishini aytib o‘tdi. O‘z o‘rnida qo‘qonlik futbol ishqibozlari buning uchun Umid Ahmadjonovga katta minnatdorchilik bildirib o‘tishdi.

Jumladan, “Qo‘qon-1912” klubi faxriy muxlisi Sherxon Qosimov O‘zbekiston OTJ Osiyo chempioni bo‘lgani munosabati bilan qo‘qonlik muxlislar nomidan Umid Ahmadjonovni tabrikladi. Yurtimizda sportga, jumladan, futbolni rivojlantirishga hukumat tomonidan katta e’tibor qaratilyotgani uchun muhtaram Yurtboshimiz Shavkat Mirziyoyevdan cheksiz minnatdor ekanliklarini aytib o‘tdi.