Futzal bo‘yicha O‘zbekiston terma jamoasi bosh murabbiyi Bahodir Ahmedov Tojikistonga qarshi (4:2) kechgan “B” guruhi 2-tur o‘yinidan keyin matbuot anjumanida ishtirok etib, o‘z fikrlarini bildirdi.

“Tojikistonga qarshi bahs oson kechmasligini bilardik. Shunga qaramay, o‘z o‘yinimizni ko‘rsatib, g‘alaba qozondik. Tojikiston shakllangan jamoa ekanini, agressiv o‘ynay olishini ko‘rsatdi.

Ajoyib uchrashuv o‘tkazgani uchun yigitlarga rahmat aytaman. Umuman olganda, jamoaning ko‘rsatayotgan o‘yinidan mamnunman.

O‘yindan o‘yinga kuchayib boryapmiz va shu ruhda davom etishimiz kerak. Ertadan Yaponiyaga qarshi bellashuvga tayyorgarlik ko‘ramiz va ushbu o‘yinni ham o‘z foydamizga hal qilishga harakat qilamiz. Maqsadimiz — har bir o‘yinda zafar quchish”, – dedi Bahodir Ahmedov.