“Paxtakor”ning portugaliyalik legioneri klubga o‘tishi va yangi mavsumdan kutayotgan jihatlari haqida fikrlarini aytib o‘tdi.

— “Paxtakor”ga o‘tishingizning asosiy sababi nimada?
— “Paxtakor” – O‘zbekistonning bosh va katta klubi. O‘rtamiyona jamoa bo‘lganda bu yerga kelmasdim. Yana jamoa o‘ynayotgan va Shota Arveladze orqali targ‘ib qilayotgan futbol katta o‘rin tutdi. Ushbu ikki jihat qarorimga ta’sir ko‘rsatdi.

— Kelishingizga qadar o‘zbek futboli haqida nimalar bilardingiz?
— Bu yerda turli jamoalarda faoliyat olib borgan do‘stlarim tufayli o‘zbek futboli bilan tanishib ulgurgandim. 2-3 yil oldin menga bu yerda futbolni yaxshi sharoitlarda o‘ynash mumkinligi va mamlakatning o‘zi juda yoqimli ekani to‘g‘risida aytishgandi.

— Yangi jamoa va mamlakatga ko‘nikish qanday kechmoqda?
— Birinchi navbatda futbolchilarga minnatdorchilik aytaman – ular meni juda iliq qabul qilishdi. Bu jamoaga tezroq moslashishimda yordam beradi. Ikkinchidan, shaharning bunchalik yaxshi bo‘lishini kutmagandim. Bundan yoqimli ajablandim. Ko‘nikish jarayonim juda yaxshi va oson kechmoqda deb o‘ylayman.

— Yangi mavsumdan nimalar kutyapsiz?
— Bosh murabbiy bilan bu masalada suhbatlashdim. Asosiy maqsadimiz – chempionlik. Har bir uchrashuvda g‘alaba uchun kurashamiz va boshqa narsa haqida o‘ylamaymiz.