Hozirgi kunda o‘zining eng yaxshi formasini ushlab turgan "Manchester Siti" muddatidan avval Yevropa chempionlar ligasining chorak final yo‘llanmasini qo‘lga kiritdi, desak mubolag‘a bo‘lmasa kerak. "Shaharliklar" Shveysariyada "Bazel" mehmoni bo‘lishdi va raqibni yanchib tashlashdi.

Gvardiola shogirdlari o‘yin boshidan tashabbusni o‘z qo‘llariga olib, asta-sekin raqib darvozasi tomon yaqinlashib keldi. Uchrashuvning 14-daqiqasida mankunianliklar burchak to‘pidan samarali foydalanib, hisobni ochishga muvaffaq bo‘lishdi. Shveysariyaliklar o‘z jarima maydonchalari ichida Gyundoganni e’tiborsiz qoldirishdi.

Oradan 4 daqiqa o‘tib hisobdagi farq oshdi. Chap qanotdan yetkazilgan uzatmani himoyachi bosh bilan qaytardi, ammo Bernardu Silva aniq zarba bilan darvozabonga imkoniyat qoldirmadi.

Ko‘p o‘tmasdan hisob 0:3 ko‘rinishiga keldi. Fernandinyo tomonidan berilgan uzatma rekoshet orqali Agueroga kelib tushdi. Argentinalik hujumchi jarima maydonchasi chizig‘i ustidan zarba berib, "Bazel" posbonini dog‘da qoldirdi.

Ikkinchi bo‘lim boshida Gyundogan chiroyli gol muallifiga aylandi: Ilkay 3 nafar futbolchidan o‘tib ketib, "yumshoq" zarba bilan to‘pni darvozaga joylab qo‘ydi.

Jamoalar 7 mart kuni Manchester shahrida javob o‘yinini o‘tkazishadi. Amalda esa "Siti" chorak final yo‘llanmasini hal qilib qo‘ydi.

YECHL, nimchorak final, javob o‘yini
Bazel Shveysariya – Manchester Siti Angliya 0:4 (0:3)
Gollar: 0:1 – 14 Gyundogan, 0:2 – 18 Bernardu Silva, 0:3 – 23 Aguero, 0:4 – 53 Gyundogan.
Bazel – Vaslik, Suxi, Riveros, Lang, Lakrua, Die, Jaka, Elyunussi (Byua, 85), Fray, Shtoker (Ayeti, 71), Oberlen.
Manchester Siti – Ederson, Otamendi, Kompani, Uoker, Delf, Gyundogan, Fernandinyo, Bernardu Silva, de Bryuyne (Silva, 63), Sterling (Sane, 57), Aguero (Danilo, 85).
Ogohlantirishlar: Jaka (38), Fernandinyo (59), Die (89), Gyundogan (89).