Bugun stadionimiz anjumanlar zalida, OCHL-2018 “S” guruhi 2-tur doirasidagi “Nasaf” – “Al Vasl” jamoalari o‘rtasidagi uchrashuv oldidan matbuot anjumani bo‘lib o‘tdi. Matbuot anjumanining dastlabki qismida “Al Vasl” klubi bosh murabbiyi Rodolfa Arrauabarrena va jamoaning 8-raqamdagi yarim himoyachisi Entoni Kasereslar ishtirok etishdi.
Rodolfa Arrauabarrena: -Avvalo assalomu alaykum hurmatli jurnalistlar. Ertaga dastlabki uchrashuvda mag‘lubiyatga uchragan ikki jamoa o‘zaro kuch sinashadi. Ikkala jamoaga ham ochkolar zarur. Ertaga shuningdek ikki jamoani ham qiyin uchrashuv kutib turibdi. Raqibimizda bizga nisbatan imkoniyat ko‘proq, chunki ular o‘z maydonida o‘ynashadi. Ammo o‘yinga yaxshi tayyorgarlik ko‘rdik. Biz ham ertaga g‘alaba qozonishga harakat qilamiz.
O‘tgan uchrashuvda o‘z maydonimizda o‘ynab, mag‘lubiyatga uchraganimiz biz uchun alamli bo‘ldi. So‘nggi daqiqada ikkinchi golni o‘tkazib yuborganimiz mag‘lubiyatimizga sabab bo‘ldi. Shuningdek bu uchrashuvdan oldin biz mamlakat kubogi uchrashuvida asosiy raqibimiz bilan o‘yin o‘tkazdik. Bu uchrashuvda futbolchilarimiz katta kuch yo‘qotishgan edilar.
Tarkibimiz haqida. Hech bir murabbiy o‘yindan oldin o‘z tarkibi haqida aniq ma’lumot bermaydi. Kechirasizlar, men ham ertaga maydonga tushadigan jamoamiz tarkibi haqida ochiq gapirish istagida emasman. Ammo tarkibimizda ayrim yo‘qotishlar yo‘q emas. Ba’zi futbolchilarimiz jarohati tufayli bu yerga kelmadi. Aniq maydonga tushadigan tarkibimiz haqida ertaga, o‘yindan oldin ma’lumotga ega bo‘lasiz.
OCHLdagi vazifamiz haqida? Bunday nufuzli musobaqada ishtirok etmaganmizga o‘n bir yil bo‘ldi. Shu bois ba’zi futbolchilarimizda tajriba ham yetishmayapti. Bizda “Al Ayn”dek OCHLdagi ishtiroki bilan katta tajribaga ega klublar bor. Bunga qaramasdan biz ham OCHLda yaxshi natijaga erishishga harakat qilamiz.
Qarshiga yarim himoyachimiz Fabio Limani olib kelmadik, unda kichik jarohat borligi bois uyda qoldirdik. Hujumchimiz va jamoamiz sardori Kayo Kanedo shu yerda, u ertaga maydonga tushishi mumkin.
“Nasaf” ham o‘tgan o‘yinda yutqazib qo‘ydi. Ammo ular darvozasidan uchta gol o‘tkazib yuborishga munosib emasdi. “Nasaf” juda yaxshi o‘yin namoyish etdi. To‘g‘ri, ayrim xatolar bo‘ldi. Biz bu o‘yinni yaxshi tahlil qildik va raqibimizning bu xatolaridan biz ham ertaga foydalanishga urinib ko‘ramiz.
Mamlakatingiz chempionati qit’amizda eng kuchli chempionatlardan biri hisoblanadi. “Nasaf” ham shunday kuchli chempionat ishtirokchisi hisoblanadi. Jamoa yinchilarida jismoniy va boshqa sifatlar ham yuqori darajada.
Entoni Kaseres: -Ertaga albatta juda qiyin o‘yin bo‘ladi. Raqibimiz “Nasaf” ham juda kuchli o‘yin ko‘rsatadi. Shunday bo‘lsada chiroyli o‘yin ko‘rsatib, g‘alaba qozonishga harakat qilamiz. O‘ylaymanki, muxlislar ertaga qiziqarli o‘yin guvohi bo‘lishadi.
Dubayning ob-havosi bilan bu yerni ob-havosida farq bor. Bu ham maydon egalariga qo‘l keladi, ammo ertaga biz ham ijobiy natijani qo‘lga kiritishga urinib ko‘ramiz.
