“Nasaf” – “Al Vasl” jamoalari o‘rtasidagi uchrashuv oldidan bo‘lib o‘tgan matbuot anjumanining navbatdagi qismida,  jamoamiz ustozi Ro‘ziqul Berdiyev va himoyachimiz Igor Golbanlar ishtirok etishdi.

-Avvalo assalomu alaykum. Ertaga ikki mag‘lubiyatga uchragan jamoa maydonga tushadi. Ikkala jamoani ham faqat g‘alaba qoniqtiradi. O‘ylaymanki, ertaga qiziqarli o‘yin bo‘ladi. Biz bu o‘yinga futbolchilarimizni yaxshi tayyorladik. Biz uchun uch ochko juda muhim, shu maqsadda ertaga maydonga tushamiz.

O‘tgan o‘yinda yo‘l qo‘ygan xatolarimizni chuqur tahlil qildik. Bu borada futbolchilarimizga tegishli ko‘rsatmalar ham berdik. O‘ylaymanki, bu xatolar boshqa takrorlanmaydi. O‘tgan o‘yinda bizda o‘yin tizginini qo‘lga oladigan yetakchi yetishmadi. To‘pni nazorat qilishda ham oqsadik. Bundan kerakli xulosalarni chiqardik.

Raqibimiz haqida. Raqibimizni yaxshi o‘rganib chiqdik. “Al Vasl”da ham boshqa raqiblarimizdek o‘yin amaliyoti kuchli, chunki ularda ham ichki chempionat eng qizg‘in pallada. Ularning keyingi to‘rtta o‘yinini o‘rganib chiqdik. Jamoaning oldingi chizig‘ida o‘ynaydigan uchta o‘yinchi juda xavfli. Bunga qarshi o‘yinchilarimizni tayyorladik.

Biz yangi futbol mavsumida uchinchi rasmiy o‘yin o‘tkazish arafasidamiz. Bizda o‘yin amaliyoti yetishmasligi bahona bo‘la olmaydi. Jahongir Aliyevni hozirgi holati, bizga yordam berishga tayyor. Ammo uning o‘yinga tushish yoki tushmasligi ertaga aniq bo‘ladi.

Igor Golban: - Ertaga qiziqarli o‘yin bo‘ladi. O‘yinga yaxshi tayyorgarlik ko‘rdik. Biz bo‘lajak o‘yinga tayyormiz. Ertaga muxlislarimizni xursand qilish niyatidamiz.