O‘tgan mavsumni Samarqandning «Dinamo» jamoasida to‘p surgan Sardor Sulaymonov yangi mavsumda «Navbahor» sharafini himoya qiladigan bo‘ldi. Xo‘sh, uning dastlabki taassurotlari qanday?
- Sardor, «Navbahor»ga qanday kelib qoldingiz?
- Aslida «Dinamo»da yangi mavsumda ham to‘p surish niyatim bor edi. Voqealar rivoji biz kutgandek bo‘lmadi. Jamoaning Pro-ligada o‘ynashini kutmagandik. Shu bois jamoani tark etishga majbur bo‘ldim. Mendan tashqari, deyarli barcha asosiy tarkib futbolchilari boshqa klublarga o‘tib ketishdi. «Navbahor»dan taklif bo‘ldi, chorlovga labbay deya jamoa mashg‘ulotlarida ishtirok etmoqdaman.
- Klubda qanday kutib olishdi?
- Iliq. Deyarli barcha futbolchilar bilan tanishman. O‘zaro til-topishishda muammo ko‘zga tashlanmadi.
- «Navbahor»da yangi mavsumni o‘tkazasiz. Umuman olganda hayajon bormi?
- Klub bilan bir yillik shartnomaga imzo chekdim. To‘g‘risi, Namanganda o‘tadigan dastlabki o‘yinimizni intizorlik bilan kutmoqdaman. Bilamiz, Namanganda futbolni qattiq ardoqlashadi. Muxlislar to‘la o‘yingohda o‘ynash boshqachada, baribir.
- «Navbahor»dagi raqobatdan cho‘chimayapsizmi?
- Darhaqiqat, jamoada yosh va tajribali futbolchilar jamlangan. O‘tgan yilgi natijaning o‘zi «Navbahor»ni kuchini ko‘rsatib turibdi. Raqobatdan qo‘rqmayman, bo‘lmasa jamoaga o‘tmasdim.
- «Dinamo»da bir yil to‘p surib, muxlislar orttirishga erishdingiz. Namangan jamoasida yo‘qolib qolmaysizmi?
- «Navbahor»da o‘zimni ko‘rsata olaman, deb o‘ylayman. Muxlislar juda talabchanligi ma’lum. Shunday bo‘lsa-da, ularning va murabbiylarimizning ishonchini qozona olaman.
- «Navbahor» oldiga kuchli uchlikka kirish vazifa qilib belgilangan. Jamoa bunga qodirmi?
- Viloyat hokimi tomonidan shunday topshiriq berilganini eshitdim. Jamoada barchasi joyida, futbolchilar ahil-inoq. Superligida 3-o‘rin uchun kurash qizg‘in kechishini aytish mumkin. O‘ylaymanki, bir tan bo‘lib ushbu vazifani bajarishga harakat qilamiz.
O. Naimov suhbatlashdi
