O‘yin yakunlariga bag‘ishlangan matbuot anjumanining navbatdagi qismida “Nasaf” ustozi Ro‘ziqul Sa’dullayevich ishtirok etib o‘z fikrlarini bildirib o‘tdi.

Ro‘ziqul Berdiyev: - Muxlislarimizni g‘alaba bilan tabriklaymiz. OCHLda g‘alabalar osonlikcha qo‘lga kiritilmaydi. Bugun yigitlar juda mashaqqatli ishni bajarishdi. Bugun raqibga o‘yin bo‘yicha hech qanday imkoniyat qoldirmadik. Ularni birgina darvoza tomon tepgan zarbasini inobatga olmasak, boshqa vaziyat yarata olishmadi.

Saydullo Rahmatov jamoamiz o‘yinchisi hisoblanadi, jamoamizdagi raqobat uni kamroq o‘yinga tushishiga sabab bo‘layotgan edi. Biz unga ishonishda davom etamiz.

Biz agar bugungidek o‘yin ko‘rsatsak, har qanday raqibni mag‘lub etishimiz mumkin.  Ammo hali kamchiliklardan forig‘ emasmiz, mavsum endi boshlanayapti, kamchiliklar ustida ishlashda davom etamiz.

Tez kunda Superliga o‘yinlari start oladi. Birinchi turda bizni "Neftchi"ga qarshi jiddiy bahs kutmoqda. Keyin esa oradan to‘rt kun o‘tib "Al Sadd"ga qarshi muhim bellashuv bo‘ladi. Joriy mavsum jamoamiz uchun nihoyatda og‘ir. "Neftchi" bilan o‘yin ham qiyin bo‘ladi. Biz mehmonda o‘ynaymiz. Chempionatdagi dastlabki o‘yin hamisha oson kechmaydi.

Tarkibimizda yanada ko‘proq futbolchilar bo‘lsa, yomon bo‘lmasdi. Biz Muborakning “Mash’al” jamoasidan ayrim o‘yinchilarni tarkibimizga jalb etmoqchi bo‘ldik, hattoki sotib olishga ham tayyor edik. Nachora, “Mash’al” o‘z futbolchilarini bizga berishni hohlamadi. Ammo bizda iqtidorli yosh futbolchilar ko‘p, biz ichki imkoniyatimizdan foydalanishda davom etamiz,” – dedi Berdiyev.