Bugun "Uzbek Tigers" jamoasi Butunjahon boks seriyasi doirasida o‘zining uchinchi jangini o‘tkazdi.
Sakkizinchi mavsumning uchinchi turidan o‘rin olgan bellashuvda jamoamizga Kolumbiyaning "Colombia Heroicos" jamoasi raqiblik qildi.
Dastlabki jangda 52 kg vazn toifasida ringga ko‘tarilgan hamyurtimiz Xudoynazar Fayzov raqibi Keybar Avilaga 0:2 hisobida yutqazib qo‘ydi. Ammo bokschilarimiz keyingi janglarda ustunlikni o‘z tomonlariga og‘dira olishdi.
Quvonarlisi, ikki nafar bokschimiz raqibini nokautga uchratdi. Jumladan, ringga 60 kg vazn toifasida ringga chiqqan Shunqor Abdurasulov raqibi Duvan Zuletani nokautga uchratgan bo‘lsa, 69 kg vazn toifasida jang olib borgan Mahmud G‘oipov Aleksandr Ranxelni ringni uchinchi raunddayoq tark etishga majbur qildi. Ya’ni nokautga uchragan Ranxel uchinchi raunddan keyin jangni davom ettira olmadi.
81 kg vazn toifasida kurashgan Bektemir Meliqo‘ziyev ham g‘alaba qozondi. U raqibi Diyego Motovani 3:0 hisobida yengdi. So‘nggi jangda esa 91 kg vazn toifasida Bahodir Jalolov Kristian Saldekoga ham imkoniyat qoldirmadi — 3:0. Shunday qilib, vakillarimiz kolumbiyalik bokschilar ustidan umumiy 4:1 hisobida zafar quchishdi.
Ayni damda "Uzbek Tigers"“A” guruhida 6 ochko bilan ikkinchi o‘rinda bormoqda. Kubada ham 6 ochko bor. Kolumbiya va Venesuela esa 4 ochkoga ega.
"Uzbek Tigers"— "Colombia Heroicos"— 4:1
-52 kg: Xudoynazar Fayzov — Keybar Avila — 0:2
-60 kg: Shunqor Abdurasulov — Duvan Zuleta — (Abdurasulov raqibini nokautga uchratdi)
-69 kg: Mahmud G‘oipov —Aleksandr Ranxel — (G‘oipov raqibini nokautga uchratdi)
-81 kg: Bektemir Meliqo‘ziyev —Diyego Motoa — 3:0
+91 kg: Bahodir Jalolov —Kristian Salkedo — 3:0
