O‘zbekiston Milliy Olimpiya qo‘mitasi prezidenti va O‘zbekiston futbol Assosiasiyasi 1-vise-prezidenti Umid Ahmadjonov  Superliganing ochilish uchrashuvlaridan biri bo‘lgan “Neftchi” – “Nasaf” uchrashuvini Farg‘ona shahridagi “Istiqlol” stadionidan bevosita kuzatib borish uchun Farg‘onaga tashrif buyurgani haqida avval xabar berib o‘tgandik.

Umid Ahmadjonov Farg‘onadagi “Istiqolol” stadionida Superliganing 1-turidan o‘rin olgan “Neftchi” – “Nasaf” uchrashuvini ochib berdi. Ochilish marosimi haqiqiy bayramga aylanib ketganini ham alohida ta’kidlash kerak. Stadion muxlislar bilan to‘lib-toshdi. Ochilish uchrashuvida futbolimiz afsonasi Birodar Abduraimov, Xitoydagi Osiyo chempionati g‘oliblari, sportchilar, Yopiq inshootlardagi Osiyo o‘yinlari sovrindorlari va boshqa sport jamoatchiligi vakillari qatnashdi.

Marosimda so‘zga chiqar ekan, Umid Ahmadjonov barchani yangi mavsum ochilishi bilan tabrikladi. Superliganing har bir uchrashuvida muxlislar mana shunday stadionlarni to‘ldirib o‘tirishsa, bu futbolchilar uchun ham o‘zgacha kayfiyat baxsh etishini ta’kidladi. Muxlislar stadionlarga kelib futbol tomosha qilishlari uchun O‘zbekiston futbol Assosiasiyasi tomonidin bir qator chora-tadbirlar amalga oshirilgani, jumladan, o‘yinlar boshlanishi muxlislar uchun qulay vaqtlarga moslangani haqida gapirib o‘tdi. Keyin esa bugun maydonda harakat qiladigan har ikki jamoaga omad tiladi.

O‘yindagi dastlabki zarbani ramziy ravishda futbolimiz afsonasi Birodar Abduraimov amalga oshirdi. Shundan keyin FIFA referisi Ravshan Ermatov uchrashuvga start berdi.