"Nasaf" ertaga Osiyo chempionlar ligasining 3-turi doirasida Qatarning "As-Sadd" klubini qabul qiladi. O‘yinoldi matbuot anjumanining navbatdagi qismida qarshiliklar ustozi Ro‘ziqul Berdiyev hamda hujumchi Bobir Abduxoliqov ishtirok etishdi.

"OCHL katta nufuzga ega hisoblanadi. Bu musobaqada kuchsiz jamoalar bo‘lmaydi. Ushbu musobaqada qatnashish uchun guruh bosqichiga chiqqanmiz. “As-Sadd” jamoasi ham guruhimizdagi jiddiy raqiblardan biri hisoblanadi. O‘zingizga ma’lum, ular guruhdagi o‘tgan ikki o‘yinda g‘alaba qozonishgan. Tarkibida yuqori ijroga ega futbolchilar talaygina.

Bunaqa o‘yinlarda futbolchilarning ruhiy tayyorgarligi katta ahamiyat kasb etadi. Shularni hisobga olib, bo‘lajak o‘yinga tayyorgarlik ko‘rdik. Umid qilamanki, yigitlarimiz muxlislarni xursand qilish uchun bor kuchlarini ishga solishadi. Ulardan maydonda erkin harakat qilishi talab etiladi.

Jamoamizda yo‘qotishlar yo‘q. Hamma futbolchilarimiz o‘yinga tayyor. Hujumchimiz Dragan Cheran Farg‘onada bo‘lgan o‘yinda maydonga tushmadi. Unda kichik jarohat bor edi. Biz tavakkal qilishni hohlamadik. Ammo u bugun mashg‘ulotlarimizga qo‘shildi va ertaga bo‘ladigan o‘yinda jamoamizga yordam beradi.

Doniyor Narzullayev hozir Toshkentda, shifokorlar nazoratida bo‘lib turibdi. Uning ahvoli ancha yaxshi. Shuni alohida ta’kidlash joizki, u tezroq safga qaytib jamoadoshlarimga yordam beray deyapti. Umid qilamizki, futbolchimiz yaqin kunlarda mashg‘ulotlarimizga qo‘shiladi", — dedi Ro‘ziqul Berdiyev.

"Ertaga bizni qiziqarli uchrashuv kutib turibdi. Bizga raqib qanday kuchga ega ekanligini unchalik ahamiyati yo‘q. Ammo raqibimizni hurmat qilamiz. Biz ertaga muxlislarimizni xursand qilish maqsadida, g‘alaba uchun maydonga tushamiz. G‘alaba qozonish uchun borimizni beramiz. Kamchilik har jamoada ham bo‘ladi, biz ham raqibni yaxshi o‘rgandik. Ertaga raqibni xato va kamchiliklaridan foydalanishga urinamiz" — dedi Bobur Abduxoliqov.