«Fiorentina» sardori Davide Astorining vafoti butun futbol jamoatchiligini tushkun holatga tushishga majbur qildi. Ayniqsa italiyalik muxlislar buni og‘ir qabul qilishdi. Astorining jamoadoshi Rikardo Saponaraning o‘z sardoriga yo‘llagan vidolashuv maktubi ko‘ngillarni larzaga keltirdi.
«Sardor, mening sardorim! Nimaga bugun biz bilan nonushta qilishga kelmading? Nimaga odatdagidek Markoning (Marko Sportello, darvozabon) xonasidan oyoq kiyimingni olib, odatdagidek senga atalgan apelsin sharbatini ichishga kelmading? Ular bizga hayot davom etadi, o‘zingizni qo‘lga oling deyishyapti, lekin sensiz buni qanday eplaymiz?
Endi kim ertalab oshxonaga birgina tabassumi bilan barchani xursand qilib kirib keladi? Kim bizdan kechasi nima qilganimizni so‘rab kuldiradi? Endi kim yosh futbolchilarni urshib, ularga tanbeh beradi? Biz endi kim bilan shoular, seriallar va restoranlarni muhokama qilamiz?
Iltimos, qayt. Birgalikda «La-la lend» va boshqa ko‘rmagan filmlarimizni muhokama qilishimiz kerak. Florensiyaga qayt, ular seni kutmoqda. Sadoqating uchun sen bilan shartnomani uzaytirishmoqchi. Chiqaqol shu la’nati xonadan. Biz seni ertaga mashg‘ulotda kutamiz.
Dunyoda shunday insonlar borki, seni bilishsa ham gaplashishmaydi. Lekin Davide kabi insonlar ham borki, seni birinchi marta ko‘rganidayoq «Florensiyaga xush kelibsan, Rikki», deb kutib oladi. Sardor, mening sardorim!»,- deb yozadi Sapanora.
«Fiorentina» Astori vafot etgan kunining ertasiga u bilan shartnomani uzaytirmoqchi edi. Klub bu kelishuvni baribir imzolamoqchi. Ma’lum bo‘lishicha, Astori bilan shartnoma butun umrga uzaytiriladi. Futbolchining maoshini ayoli va qizi olishadi. Bu futbolchini qaytarmasligi mumkin, lekin insoniylik jihatdan taqsinga sazovor…
