“Lokomotiv” – “Metallurg” uchrashuvidan keyin matbuot anjumani o‘tkazildi. Dastavval “Metallurg” jamoasi bosh murabbiyi Andrey Shipilov hamda jamoaning eng yaxshi o‘yinchisi Akbar Ismatullayev jurnalistlarni qiziqtirgan savollariga javob qaytarishdi.

Andrey Shipilov: - Avvalo men “Lokomotiv” jamoasiga ajoyib qabul va bizga zarur bo‘lgan barcha shart sharoitlarni yaratib berganligi uchun minnatdorchilik bildiraman. Bevosita o‘yinga to‘xtaladigan bo‘lsam, birinchi taymda futbolchilarning harakatlaridan qoniqish hosil qilmadik. Oddiy xatolarimiz evaziga gol o‘tkazib yubordik. Tanaffusdan keyin yigitlar barcha ko‘rsatmalarni bekamu ko‘st bajarishdi va buning uchun ulardan minnatdorman. Ikkinchi taymda tezkorlikni oshirdik, ishtiyoq evaziga kerakli natijaga erishdik. O‘tkazib yuborilgan golni hali tahlil etamiz. O‘yindan to‘liq qoniqmagan bo‘lsamda, natija bizni xursand etdi. Bugun biz bir ochko ishladik. Hali qiladigan ishlarimiz ko‘p, yigitlarni optimal formamizga yetkazish uchun mehnatdan to‘xtamasligimiz lozim.

Akbar Ismatullayev: - O‘yin qiyin kechishini bilardik. Bizning jamoamiz endi shakllanayapti, bu ikkinchi rasmiy o‘yinimiz bo‘ldi. Tarkib sakson-to‘qson foizga yangilangan. Bugun qiziqarli o‘yinning guvohi bo‘ldik. O‘ylaymanki, o‘yindan o‘yinga kuchayib boramiz. Bizga ishongan va qo‘llab-quvvatlagan muxlislarga rahmat.