"Lokomotiv" - "Al Duhail" bahsidan so‘ng o‘tkazilgan matbuot anjumanida "temiryo‘lchilar" jamoasi ustozi Andrey Miklyayev quyidagicha fikr bildirdi:
- Uchrashuv ancha qiyin tarzda o‘tdi. "Al Duhail" chindan kuchli jamoa ekanini isbotlay oldi. Menimcha, ushbu klub musobaqaning eng favorit jamoalaridan biri. Ularning tarkibi uzoq vaqtdan buyon birgalikda o‘ynab kelmoqda. Shu sababli futbolchilar bir-birini maydonda yaxshi tushunishdi. Bizga esa biroz o‘yin amaliyoti yetishmayotgani bilindi. Bugun omad raqibga kulib boqdi. Himoyada yo‘l qo‘yilgan ikki xato yakunda bizga qimmatga tushdi.
Bugungi mag‘lubiyatida kimnidir alohida ayblash noto‘g‘ri. Bugun butun jamoa yutqazdi. Endi guruhdagi ikkinchi o‘yinga e’tibor qaratishga majburmiz. Nazariy jihatdan hali imkoniyatlarimiz saqlanib qolmoqda. O‘ylashimcha, keyingi 2ta o‘yinni g‘alaba bilan yakunlasak guruhdan chiqshimiz mumkin, - dedi tajribali mutaxassis.
