Rossiyalik taniqli futbolchi, "Selta"ning sobiq hujumchisi Aleksandr Mostovoy britaniyalik futbol eksperti Jeymi Karragerning so‘zlariga izoh berdi.

Kuni kecha "MYU" muxlisining mashinasiga tupurgan Karrager o‘z vaqtida Mostovoy unga tupurganini eslagan edi.

"To‘g‘risini aytsam, buni eshitish kulguli. Karrager avval ham buni aytgan edi. Buni bugun yana takrorladi. Men ataylab o‘sha o‘yinning videosini topdim va vaziyatni qayta ko‘rdim. Hech narsa bo‘lmaganiga yana bir ishonch hosil qilishim uchun.

Bu mana bunday bo‘lgan edi. Biz Vigoda o‘ynayotgan edik, men gol urdim, Karrager esa meni shaxsan qo‘riqlagan edi, har doimgiday qo‘pol va iflos o‘yin. Uning oldiga yaqinlashib, "hozir oladiganingni olasan" dedim. Yoki shunga o‘xshash gapni aytdim.

Tupurish - ahmoqlik. Uch yil avval Karragerning bu gapini eeshitib hayron qolgandim. Shuning uchun uning gaplariga e’tibor bermayman - bu ishni hayotda qilmaganman.

Karragerning muxlisga tupurganiga kelsak, uni bo‘shatmasalar kerak. Tushunishimcha, uning asabiga tegishgan. Yo‘lda ketayotib, uning jig‘iga tegishgan. U nima qilishi kerak edi?

Qarang-a, yo‘lda ketayotganimda kimdir meni haqorat qila boshlasa! Shu zahoti to‘xtab, uning basharasini yorardim", - deydi Mostovoy.