Yevropa chempionlar ligasi nimchorak final bosqichi doirasida «Manchester Yunayted» o‘z uyida «Sevilya»ni qabul qildi.

Jamoalar uchrashuvning aksariyat qismida yopiq o‘yin namoyish qilishdi. Hech bir jamoa tavakkal qilishni istamadi. Ispaniyalik bosh murabbiyi bahsning 72-daqiqasida Vissam Ben-Yedderni zaxiradan maydonga tushirdi. Aynan ushbu futbolchi o‘yin taqdirini hal qildi. 74-daqiqada markaz bo‘ylab uyushtirilgan hujum paytida forvard jarima maydonchasi ichida to‘pni qabul qildi va 14 metrlardan aniq zarba bilan darvozani ishg‘ol qildi. Andalusiyada bo‘lib o‘tgan o‘yinda juda ko‘p seyv namoyish qilgan David de Xea bu safar ojiz qoldi.

Oradan 4 daqiqa o‘tib ben Yedder yaqin masofadan zarba berdi. To‘p to‘singa tegib, yerga tushdi va chiziqni kesib o‘tdi. Yerda yotib qolgan "MYU" posboni yana jamoasini qutqara olmadi.

Uchrashuv tugashiga 6 daqiqa qolganida Romelu Lukaku burchakdan yetkazilgan uzatmani darvozaga joylab, o‘yinga intrigani qaytardi. Ammo qolganiga Mourinyo shogirdlarining kuchi yetmadi. Aksincha, kompensasiya vaqtida Vissam Ben-Yedder "xet-trik"ni rasmiylashtirishi mumkin edi, biroq hujumchi yakkama-yakka vaziyatda de Xeani dog‘da qoldira olmadi.

Dastlabki o‘yinda hisob ochilmagandi, safarda qozonilgan g‘alaba "Sevilya"ni chorak finalga olib chiqdi.

YECHL, nimchorak final, javob o‘yini
Manchester Yunayted Angliya – Sevilya Ispaniya 1:2 (0:0, 1:2)
Gollar: 0:1 – 74 Ben-Yedder, 0:2 – 78 Ben-Yedder, 1:2 – 84 Lukaku.
Manchester Yunayted – De Xea, Smolling, Bayi, Valensiya (Mata, 77), Lingard (Marsyal, 77), Yang, Fellayni (Pogba, 60), Matich, Sanches, Reshford, Lukaku.
Sevilya – Riko, Kyer, Eskudero, Merkado, Langle, Vaskes (Pisarro, 87), Banega, Sarabiya, Nzonzi, Korrea (Gays, 89), Muriel (Ben-Yedder, 72).
Ogohlantirishlar: Banega (5), Ben-Yedder (78), Korrea (88), Sarabiya (90), Reshford (90).
Dastlabki o‘yin — 0:0