O‘zbekiston Superligasi 3-turi doirasidan o‘rin olgan qiziqarli tarzda kechishi kutilayotgan bellashuvlardan biri Namangandagi “Markaziy” o‘yingohda o‘tadi.

Unda O‘zbekistonning 2 karra chempioni – Toshkentning “Lokomotiv” jamoasi “Navbahor” mehmoni bo‘ladi.

Ushbu uchrashuvni tajribali referi – Zokir Qodirov boshchiligidagi hakamlar guruhi boshqarib boradi.  O‘yin soat 20:00da start oladi.

17 mart (shanba)

“Navbahor” – “Lokomotiv”

Hakamlar:  Z. Qodirov (Navoiy),  R. Samandarov (Navoiy),  O. Jumayev (Navoiy),  A. Rahimov (Andijon).

Nazoratchi – A. Arutyunov (Toshkent).

Komissar – M. Saidqosimov.

Shu o‘rinda ushbu ikki jamoaning o‘zaro uchrashuvlari tarixiga e’tibor qaratadigan bo‘lsak,  “Lokomotiv” shu paytga qadar “Navbahor”ga qarshi 26ta o‘yin o‘tkazgan.  O‘zaro o‘yinlarning 14tasida “temiryo‘lchilar” jamoasi zafar quchgan.  7ta bellashuvda esa namanganliklarning “qo‘li baland” kelgan.  Yana 5ta o‘yin esa durang bilan nihoyasiga yetgan.

“Loko” futbolchilari ushbu raqib darvozasini hozirgacha 47 marta ishg‘ol etishga muvaffaq bo‘lishgan.  Darvozamizdan esa 36 bor to‘p o‘tkazib yuborganmiz.

“Lokomotiv”ning “Navbahor” ustidan qozongan eng yirik hisobdagi g‘alabasi – 5: 0 hisobida tugagan bo‘lib,  ushbu bahs 2016 yilgi mavsum ikkinchi davrasida o‘tkazilgandi.

Yana bir diqqatga sazovor jihat shundan iboratki,  “Loko” “Navbahor”ga 2010 yil 25 sentyabridan buyon mag‘lub bo‘lmay kelmoqda.