O‘zbekiston milliy terma jamoasi 23 mart kuni Senegalga qarshi,  27 mart kuni esa Marokashga qarshi o‘rtoqlik uchrashuvlari o‘tkazadi.  

Bosh jamoamiz murabbiylar shtabi mazkur o‘yinlarga “Lokomotiv” jamoasidan 8 nafar futbolchini jalb etgan. Musobaqa o‘tkazish Reglamentida belgilanganidek, klubning uch va undan ortiq futbolchilari terma jamoalarga chaqirilgan taqdirda chempionat uchrashuvini boshqa muddatga ko‘chirish imkoniyatiga ega ekanligidan kelib chiqib,  "Lokomotiv" PFK PFLga 4-tur doirasidan o‘rin olgan AGMK - "Lokomotiv" uchrashuvini qoldirish bo‘yicha murojaat qildi.

Mazkur o‘yin taqvim bo‘yicha 29 mart kuni Olmaliqda o‘tkazilishi lozim edi. Biroq "Lokomotiv" jamoasining bir qator asosiy futbolchilari terma jamoa safida 27 mart kuni maydonga tushishi boisdan 2 kun o‘tib AGMK bilan o‘yinda "Lokomotiv" to‘liq asosiy tarkibini maydonga tushira olish imkoniyati kam ekanini va "temiryo‘lchilar" 3 aprel sanasida OCHL guruh baxslarida safarda o‘ynashini inobatga olgan holda PFL ushbu uchrashuvni qoldirishga rozilik bildirdi.

Taqvim juda tig‘iz ekani va o‘yinlarning yaqin sanalar ichida o‘tkazilayotgani sababdan PFL ushbu qoldirilgan o‘yinning o‘tkazilish muddatini chuqur tahlil etib, keyin o‘yin sanasiga aniqlik kiritadigan bo‘ldi.

Shu o‘rinda yurtimizdagi ba’zi OAVlar mazkur holatni noto‘g‘ri talqin qilib, muxlislar o‘rtasida turli tushunmovchiliklarni yuzaga keltirayotganini ta’kidlab o‘tish kerak. Futbolimizda islohotlar, ijobiy o‘zgarishlar ro‘y berayotgan bir paytda yurtimizdagi OAV xodimlarini bir maqsad – futbol rivoji yo‘lida birlashishga va bu borada o‘z kuch va imkoniyatlarini islohotlarga hissa qo‘shishga sarflashga chaqirib qolgan bo‘lardik.