Futbol bo‘yicha Argentina ikkinchi ligasining bahslaridan birida  “Los Andes” va “Brovn de Adrogu” jamoalari bir-biriga qarshi to‘p surdi.

Uchrashuvning 15 daqiqasida tribunalarda muxlislar o‘rtasida boshlangan dahanaki jang keyinchalik maydondagi futbolchilarga ham “yuqdi”.

Janjal chiqishiga mehmon jamoaning muxlisi tomonidan raqib tomoshabinlari tomonga ketma-ket shishalarning uloqtirilishi sabab bo‘ldi.

“Jang” shu darajada alanga oldiki, raqiblar oddiy buyumlarga ham qanoat qilmay, bir-birlariga pichoq o‘qtalishga tushdilar. Hattoki, futbolchilardan biri raqib jamoa o‘yinchisiga sovuq qurol bilan tashlanib, tan jarohati yetkazdi.

Zudlik bilan harakatga tushgan Argentina polisiyasi bu tartibsizlikni bartaraf etdi. Avvalo pichoqbozlikdan dahshatga tushgan bolalar va ayollar qutqarildi.

Yuzdan ortiq tartibbuzar esa polisiya tomonidan qo‘lga olinib, stadiondan olib chiqib ketildi. Shundan so‘ng esa bahs davom ettirildi. Biroq, uchrashuvning 30 daqiqasida yana janjal chiqdi. “Los Andes” futbolchisini raqib o‘yinchisi bo‘yni va yuzi aralash tepdi.

O‘z vaqtida vaziyatga aralashgan hakam kutilishi mumkin bo‘lgan “gladiatorlar jangi”ning oldini oldi. Ammo “Los Andes” vakiliga havas qilib bo‘lmasdi. Butsa zarbidan uning yuzi yorilib ketgandi. Ikki marta to‘xtalib, yana davom etgan bahsda mezbonlar 2:0 hisobida g‘alaba qozonishdi.