Ayni paytda Jizzaxda davom etayotgan Superliganing 4-tur doirasidagi “So‘g‘diyona” va “Qizilqum” jamoalari o‘rtasidagi uchrashuvni 11 ming tomoshabinga mo‘ljallangan stadionda o‘n minga yaqin (9380) muxlis bevosita stadionning o‘zida tomosha qilmoqda.

Uch tur yakuniga ko‘ra muxlislarning tashrifi taxlil qilinganida avvalgi turlarga nisbatan stadionga keluvchilarning soni ortgani ma’lum bo‘lgan edi. Mana, 4-turning dastlabki turidanoq avvalgi turga nisbatan yanada ko‘proq muxlis keldi. “So‘g‘diyona” 2-turda o‘z uyida “Neftchi” jamoasini qabul qilganida, chempionatning ochilish marosimi va albatta, ko‘ngilochar dasturlar ham tayyorlangan o‘yinga 8512 nafar tomoshabin tashrif buyurgan edi. Aksiga olib, o‘sha o‘yinda maydon egalari durang natija qayd etgandi. O‘tgan turda safarda to‘p surgan jizzaxliklar “Buxoro”ga yirik hisobda mag‘lubiyatga uchragandi. Manashu omillar ham jizzaxlik futbolsevarlarning rayini qaytarmadi, aksincha, sevimli jamoasini har qanday sharoitda ham qo‘llab-quvvatlashga undadi.

Birgina “So‘g‘diyona” misolida o‘zbekistonlik futbol ishqibozlarining  futbolga qiziqishi chinakamiga ortganiga, muxlislar stadionga shunchaki vaqt o‘tkazish emas, futboldan zavq-shavq olishga shoshayotganligini misollar bilan isbotlasa bo‘ladi. Eng e’tiborligi, stadionga oilaviy  kelish ham tobora urfga aylanayotganligini bir qator uchrashuvlarda guvohi bo‘ldik.