Kataloniyaning "Barselona" jamoasi Chempionlar ligasida eng ko‘p uchrashgan raqiblar qaysilar ekanini bilasizmi? Quyida bu haqda ma’lumotga ega bo‘lishingiz mumkin.
6-11. "Bavariya". 8 o‘yin. 2 g‘alaba, 1 durang, 5 mag‘lubiyat. 11:14
"Bavariya" va "Barselona" jamoalari CHLda ilk marta 1998 yili to‘qnash kelishgan edi. O‘shanda guruh bosqichidagi har ikkala bellashuvda ham myunxenliklarning qo‘li baland kelgan. 2009 yili turnirning chorak finalida "Kamp Nou"dagi to‘qnashuvda "Barsa" yirik 4:0 hisobida zafar quchdi. Javob o‘yinida esa 1:1 hisobi qayd etildi. Shu tariqa "ko‘k anorranglilar" yarim finalga yo‘l olishgan va keyinchalik musobaqa g‘olibi bo‘lishgandi. Oradan 4 yil o‘tgach jamoalar yarim finalda uchrashishdi. "Bavariya" ikki o‘yinda ham yirik hisobdagi g‘alabani tantana qilib, finalga yo‘l olgan edi. Yupp Xaynkess shogirdlari o‘sha mavsum g‘oliblik nashidasini surishgan. 2015 yilda esa "Barselona" nemis jamoasidan munosib o‘ch ola bildi. Kataloniyada 3:0 hisobida g‘alaba qozongan jamoa, mehmonda 2:3 hisobida yutqazgan bo‘lsa ham finalga yo‘l olgan va keyinchalik chempion bo‘lgan edi.
Faktlar:
1. Har ikkala jamoa ham bir martadan 3:0 va 4:0 hisobida g‘alaba qoozngan.
2. Jamoalar pley-offda uchrashishganda, g‘alaba qozongan jamoa, keyinchalik albatta chempion bo‘lgan.
6-11. "Dinamo" Kiyev. 8 o‘yin. 5 g‘alaba, 3 mag‘lubiyat. To‘plar nisbati 14:12
1992 yili mazkur jamoalar birinchi bor uchrashishgan. O‘shanda har ikkala o‘yinda ham kataloniyaliklar osonlikcha g‘alaba qozonishgan. Oradan bir yil o‘tgach 1/16 final bosqichida Kiyevda mezbonlar 3:1 hisobida ustun kelishdi. Biroq javob bahsida "Barsa" 4:1 hisobida g‘alaba qozonib, keyingi bosqichga yo‘l oldi. 1997 yili guruh bosqichida Kiyevliklar uyda 3:0, "Kamp Nou"da esa 4:0 hisobida zafar quchishgan. 2009 yili yana guruh bosqichida jamoalar yana bir bor to‘qnash kelishdi va undagi har ikki o‘yinda ham Gvardiola murabbiylik qilgan ispan jamoasi g‘alaba qozondi.
