Turindagi «Yuventus Stedium» o‘yingohida Italiya A seriyasining 30-turi doirasida markaziy o‘yin bo‘lib o‘tdi. "Yuventus" o‘z uyida "Milan"ni qabul qildi va qiyinchilik bilan g‘alaba qozondi.

Turinlilkar tezkor gol urishga muvaffaq bo‘lishdi. Bahsning 8-daqiqasida Dibala tomonidan olis masofadan yo‘llangan zarbani Donnarumma qaytara olmadi. Milanliklar birinchi bo‘limning o‘zida muvozanatni tiklashdi. Burchakdan yetkazib berilgan uzatmani "Yuventus"ning sobiq himoyachisi Leonardo Bonuchchi bosh bilan "keksa sinyora" darvozasiga joylab qo‘ydi.

Gattuzo shogirdlari qolgan daqiqalarda raqibga yaxshi qarshilik ko‘rsatishdi, ayrim pallalarda hujumni yakunlashda ularga biroz aniqlik yetishmadi. Ammo uchrashuv so‘ngida "Yuve" bosimni oshirdi va g‘alabani ilib ketdi. Dastlab zaxiradan tushgan Kuadrado bosh bilan darvozani ishg‘ol qilgan bo‘lsa, keyinchalik Xedira aniq zarba bilan o‘yinga nuqta qo‘ydi — 3:1.

Ushbu g‘alabadan keyin "Yuventus" ta’qibchi — "Napoli"dan 4 ochkoga ilgarilab ketdi.

Italiya A seriyasi, 30-tur
Yuventus – Milan 3:1 (1:1, 2:0)
Gollar: 1:0 – 8 Dibala, 1:1 – 28 Bonuchchi, 2:1 – 79 Kuadrado, 3:1 – 87 Xedira.
Yuventus – Buffon, Benatiya, Kyellini, Bardzali, Lixtshtayner (Duglas Kosta, 46), Matyuidi (Kuadrado, 61), Asamoa, Xedira, Pyanich (Bentankur, 75), Iguain, Dibala.
Milan – Donnarumma, Romanyoli, Rodriges, Bonuchchi, Kalabriya, Kessie, Bigliya (Montolivo, 76), Chalxanoglu (Kutrone, 80), Bonaventura, Suso, Andre Silva (Kalinich, 65).
Ogohlantirishlar: Benatiya (38), Rodriges (39), Bigliya (52), Montolivo (82).