«Lokomotiv» Chempionlar Ligasi 5-turi doirasida BAAning «Al Vahda» jamoasi bilan bahs yuritib, 4:1 hisobida g‘alabaga erishdi. Uchrashuvdan so‘ng o‘tkazilgan matbuot anjumanida «temiryo‘lchilar» jamoasi ustozi Andrey Miklyayev quyidagicha fikr bildirdi:
- Bugun biz juda muhim g‘alabaga erishdik. Zero so‘nggi paytlarda biroz omadimiz chopmayotgan edi. Bugungi g‘alaba esa butun jamoamizga yana shijoat bag‘ishlaydi va ishonamanki, bundan buyon g‘alabali seriyalarni boshlab yuboramiz. Bugungi o‘yinda raqibni yengishimizga ishongan edim. Lekin yirik hisobda g‘alaba qozonishimizni taxmin qilmagandim. Shunday bo‘lsada safarda yirik hisobda g‘alabaga erishilgani kishini quvontiradi, albatta. Endi butun e’tiborimizni so‘nggi tur bahsiga qaratamiz. Barchasiga Toshkentdagi uchrashuvda oydinlik kiritiladi. Ishonamanki, o‘z ishqibozlarimiz qarshisida chiroyli o‘ynab, keyingi bosqich masalasini ijobiy hal qilamiz va Osiyo Chempionlar Ligasidagi yurishimizni davom ettiramiz, - dedi tajribali mutaxassis.
