Avval xabar berganimizdek, O‘zbekiston futbol Assosiasiyasining sun’iy qoplamali maydonida O‘FA taqvim rejasida belgilangan “Navro‘z Kubogi”ning 2004 yilda tug‘ilgan o‘smirlari o‘rtasidagi musobaqasi yakuniga yetdi.

15 ta jamoa to‘rt guruhda kurash olib borgani, chorak va yarim final bahslaridan keyin 3-o‘rin uchun “Navoiy” va “Andijon”, 1-o‘rin uchun esa “Iftixor” va “Yangiyer” yosh futbolchilari maydonga tushishlarini yozgandik. Biroq musobaqa taqvimida o‘zgarish yuz berdi. Yarim finalda g‘alaba qozongan “Iftixor” jamoasi tarkibida ro‘yxatdan o‘tmagan futbolchi maydonga tushgani va bu bilan jamoa Reglament tartib-intizom kodeksining 5.11 moddasini buzganligi uchun turnir tashkilotchilari ushbu jamoaning yarim finaldagi o‘yin natijasini bekor qildi. Unga ko‘ra, yarim finalda mag‘lub bo‘lgan “Andijon” jamoasiga texnik g‘alaba va final yo‘llanmasi berildi, “Iftixor” esa chorak final natijasi bilan kifoyalanadigan bo‘ldi.

Shu tariqa musobaqaning hal qiluvchi finalida Andijon va Yangiyer ixtisoslashgan futbol maktablarining yosh futbolchilari o‘zaro kuch sinashadigan bo‘ldi. Qiziqarli kechgan o‘yinda andijonliklar yirik hisobda zafar quchishdi va “Navro‘z Kubogi” g‘olibi bo‘lishdi.

Kichik oltin, kumush va bronza medallari bilan taqdirlangan “Andijon”, “Yangiyer” va “Navoiy” jamoalariga diplomlar va Kuboklar topshirildi.